“Ҳормуздан рухсатсиз ўтганлар хавф остида қолади” — Эрон

Эрон Ислом инқилоби посбонлари корпуси Ҳормуз бўғозидан рухсатсиз ўтиш ҳолатларига йўл қўйилмаслиги ҳақида огоҳлантирди. Унга кўра, бу талабга риоя қилмаган кемаларга нисбатан чора кўрилади. Шунингдек, улар сув йўли орқали очилган янги маршрутни танқид қилди.

Теҳрон келажакда божлар ўрнига, ўз таъбири билан айтганда, денгиз хизмати йиғимларини жорий этишни режалаштирмоқда. АҚШ эса бу халқаро сув йўли бўлганлиги учун ундан ўтишга ҳақ олинмаслиги кераклигини айтмоқда.

“Ҳормуз бўғози орқали ўтиш учун рухсат этилган ягона йўналиш Эрон Ислом Республикаси томонидан эълон қилинган йўналишдир. Ҳар қандай рухсатсиз кесиб ўтиш номақбул ҳисобланади ва хавф остида қолади”, — дея огоҳлантирди Ислом инқилоби посбонлари корпуси баёнотида.

Танкернинг ўтиши

Огоҳлантириш 25 июнь куни Либерия нефть танкери Уммон қирғоғига яқин йўналиш бўйлаб бўғоздан ўтганидан сўнг эълон қилинди.

Associated Press (AP) ахборот агентлигининг хабар беришича, Ҳормуз бўғозидан ўтишни режалаштираётганини билдирган “ Stoic Warrior” кемаси пайшанба куни эрта тонгда йўлга чиқиб, Бирлашган Араб Амирликлари ва Уммон қирғоқлари бўйлаб ҳаракатланган.

APга кўра, кема Уммоннинг Мусандам яримороли яқинидаги қирғоқ бўйлаб сузиб ўтган.

“Ал-Жазира”нинг Теҳрондаги мухбири Расул Сардорнинг хабар беришича, Ислом инқилоби посбонлари корпуси янги йўналишдан норози.

“Бунга сабаб, янги йўналиш қайсидир маънода Ҳормуз бўғози устидаги Эрон назоратини четлаб ўтмоқда”, — деди у.

Теҳроннинг таъкидлашича, АҚШ ва Эрон якуний келишувга эришганидан кейин ҳам Эрон бу босим воситасидан ҳеч қачон воз кечмайди ва у ерда Эрон назорати сақланиб қолади.

Ҳормуз – Эрон ва Ўмон ўртасидаги тор сув йўли бўлиб, жаҳон хом нефти ва суюлтирилган табиий газининг тахминан 20 фоизи одатда шу бўғоз орқали ташилади.

Унинг энг тор қисми тахминан 30 км кенгликда.

Ҳозирда Эрон рухсат берган ягона йўналиш мамлакат қирғоғи бўйлаб ўтган йўлакдан иборат.

Теҳрон ва Вашингтон ўртасида ўтган ҳафта сулҳни узайтириш бўйича имзоланган меморандумда тижорат кемалари келгуси 60 кун давомида бўғоздан бепул ўтиши мумкинлиги кўзда тутилган.

23 июнь куни Эрон ва Уммон бўғозни бошқариш билан боғлиқ хизматлар учун олинадиган “йиғимлар”ни ўрганиб чиқишларини эълон қилди.

Бироқ шу ҳафта қўшни Кўрфаз мамлакатларида сафарда бўлган АҚШ Давлат котиби Марко Рубио Вашингтон ҳеч қандай бож ёки йиғимларга рози эмаслигини таъкидлади.