АҚШ ва Эрон музокаралари тўхтаб қолди: нефть нархи 1 фоиздан кўпроқ ошди

28 сентябрь куни эрталаб Brent нефти фьючерслари 1,32 долларга ёки 1,27 фоизга ошиб, баррели 105,64 долларга етди. АҚШнинг WTI нефти эса 70 центга ёки 0,76 фоизга қимматлаб, 93,11 доллар бўлди.

Эрон ўтган ҳафта Нью-Йоркда бўлиб ўтган БМТ Бош Ассамблеяси доирасида тинчлик таклифини илгари сурган. Теҳрон мазкур таклиф Қатар воситачилари орқали АҚШга етказилганини билдирган.

Трамп 27 сентябрь куни Эрон таклифини рад этганини айтди. Бироқ у Axios нашрига берган интервьюсида АҚШ ва Эрон ўртасидаги музокаралар шу ҳафта яна давом этиши мумкинлигини билдирган.

ANZ таҳлилчиларига кўра, геосиёсий хавфлар юқори даражада қолмоқда. Эрон ва Эрон томонидан қўллаб-қувватланадиган Ҳусийларнинг Саудия Арабистонига қарши ҳужумлари минтақада нефть таъминоти барқарорлигига хавф туғдирмоқда.
Яманнинг Саудия бошчилигидаги коалицияси 26 сентябрь куни Ҳусийлар томонидан Саудия Арабистони томон учирилган икки баллистик ракета ва икки дрон ушланганини маълум қилди.

Яқин Шарқдан нефть экспорти тикланмоқда

Шу билан бирга, Kpler маълумотларига кўра, Яқин Шарқдаги асосий нефть ишлаб чиқарувчи давлатларнинг сентябрь ойидаги хом нефть экспорти кунига 12,8 миллион баррелга етган. Бу февраль ойидан буён қайд этилган энг юқори кўрсаткичдир.

Экспорт ҳажмининг ўсиши Саудия Арабистони ва Бирлашган Араб Амирликларининг етказиб беришни кўпайтириши билан боғлиқ. Ҳурмуз бўғози орқали нефть ташиш ҳажми ҳам тикланиб, сентябрда кунига тахминан 7,4 миллион баррелга етиши кутилмоқда.
Саудия Арабистони Шарқий-Ғарбий нефть қувурига етказилган зарардан кейин айрим экспорт оқимларини Қизил денгиздаги Янбу портидан Форс кўрфазидаги Рас-Танура портига йўналтирган.

Шу билан бирга, АҚШда дизель ёқилғиси нархининг юқорилиги мамлакат дизель экспортини чеклаш эҳтимоли ҳақидаги муҳокамаларни кучайтирган. Reuters маълумотига кўра, бундай чеклов АҚШдан ташқари бозорларда ёқилғи таъминотини янада қисқартириши мумкин.

Муаллиф: Ҳасанбой ОЧУН