Эрон ва АҚШ бир-бирига зарба берди

8 июль куни АҚШ Ҳормуз бўғозидаги танкерларга ҳужуми учун Эронга қарши ҳарбий зарбалар берди. Бунга жавобан Эрон ҳам Баҳрайн ва Қувайтдаги АҚШ ҳарбий объектларини нишонга олди.

Ислом инқилоби посбонлари корпуси Баҳрайндаги Бандар Салмон, 5-ҳарбий-денгиз округи ҳамда Қувайтдаги Али ал-Салим авиабазасида жойлашган АҚШнинг асосий ҳарбий объектларига қарши қўшма ракета ва дрон операциясини ўтказганини ҳамда операцияга аралашишга уринган АҚШнинг МҚ-9 дронини уриб туширганини маълум қилди.

Баҳрайн ва Қувайтда ҳаво ҳужумидан огоҳлантирувчи сиреналар янграган. Қувайт армияси ҳаво ҳужумидан мудофаа кучлари душман (Эрон) ракеталари ва дронлари ҳужумига қарши курашаётганини билдирган.

Аввалроқ АҚШ бўғоздаги учта танкерга қилинган ҳужумларга жавобан янги ҳарбий зарбалар бериб, Эроннинг нефть сотишига рухсат берувчи лицензияни бекор қилган эди.

АҚШ Марказий қўмондонлиги Ислом инқилоби посбонлари корпусининг 60 дан ортиқ кичик қайиғи нишонга олинганини очиқлади. Уларнинг иддао қилишича, бу ҳаракат сулҳ битимини бузган ҳолда кемаларга зарба бергани учун Эронни қаттиқ товон тўлашга мажбурлаш мақсадида қилинган.

“Эрон кучларининг асоссиз тажовузи сулҳ битимининг очиқ ва хавфли тарзда бузилиши бўлиб, кемалар қатнови эркинлигига путур етказади”, — дейилади баёнотда.

Ўз навбатида Эрон олий қўшма ҳарбий қўмондонлиги ҳам АҚШ зарбаларини “яққол тажовузкорлик ҳаракати” дея қоралаб, “қақшатқич жавоб” билан таҳдид қилди ва Теҳроннинг АҚШнинг бўғозни бошқаришга аралашувига йўл қўймаслигини билдирди.