“Hormuzdan ruxsatsiz o‘tganlar xavf ostida qoladi” — Eron

Eron Islom inqilobi posbonlari korpusi Hormuz bo‘g‘ozidan ruxsatsiz o‘tish holatlariga yo‘l qo‘yilmasligi haqida ogohlantirdi. Unga ko‘ra, bu talabga rioya qilmagan kemalarga nisbatan chora ko‘riladi. Shuningdek, ular suv yo‘li orqali ochilgan yangi marshrutni tanqid qildi.

Tehron kelajakda bojlar o‘rniga, o‘z ta’biri bilan aytganda, dengiz xizmati yig‘imlarini joriy etishni rejalashtirmoqda. AQSH esa bu xalqaro suv yo‘li bo‘lganligi uchun undan o‘tishga haq olinmasligi kerakligini aytmoqda.

“Hormuz bo‘g‘ozi orqali o‘tish uchun ruxsat etilgan yagona yo‘nalish Eron Islom Respublikasi tomonidan e’lon qilingan yo‘nalishdir”, — dedi Islom inqilobi posbonlari korpusi.

“Har qanday ruxsatsiz kesib o‘tish nomaqbul hisoblanadi va xavf ostida qoladi”, — deya ogohlantirdi ular bayonotida.

Tankerning o‘tishi

Ogohlantirish 25-iyun kuni Liberiya neft tankeri Ummon qirg‘og‘iga yaqin yo‘nalish bo‘ylab bo‘g‘ozdan o‘tganidan so‘ng e’lon qilindi.

Associated Press axborot agentligining xabar berishicha, Hormuz bo‘g‘ozidan o‘tishni rejalashtirayotganini bildirgan “Stoic Warrior” kemasi payshanba kuni erta tongda yo‘lga chiqib, Birlashgan Arab Amirliklari va Ummon qirg‘oqlari bo‘ylab harakatlangan.

APga ko‘ra, kema Ummonning Musandam yarimoroli yaqinidagi qirg‘oq bo‘ylab suzib o‘tgan.

“Al-Jazira”ning Tehrondagi muxbiri Rasul Sardorning xabar berishicha, Islom inqilobi posbonlari korpusi yangi yo‘nalishdan norozi.

“Bunga sabab, yangi yo‘nalish qaysidir ma’noda Hormuz bo‘g‘ozi ustidagi Eron nazoratini chetlab o‘tmoqda”, — dedi u.

Tehronning ta’kidlashicha, AQSH va Eron yakuniy kelishuvga erishganidan keyin ham Eron bu bosim vositasidan hech qachon voz kechmaydi va u yerda Eron nazorati saqlanib qoladi.

Hormuz – Eron va O‘mon o‘rtasidagi tor suv yo‘li bo‘lib, jahon xom nefti va suyultirilgan tabiiy gazining taxminan 20 foizi odatda shu bo‘g‘oz orqali tashiladi.

Uning eng tor qismi taxminan 30 km kenglikda.

Hozirda Eron ruxsat bergan yagona yo‘nalish mamlakat qirg‘og‘i bo‘ylab o‘tgan yo‘lakdan iborat.

Tehron va Vashington o‘rtasida o‘tgan hafta sulhni uzaytirish bo‘yicha imzolangan memorandumda tijorat kemalari kelgusi 60 kun davomida bo‘g‘ozdan bepul o‘tishi mumkinligi ko‘zda tutilgan.

23-iyun kuni Eron va Ummon bo‘g‘ozni boshqarish bilan bog‘liq xizmatlar uchun olinadigan “yig‘imlar”ni o‘rganib chiqishlarini e’lon qildi.

Biroq shu hafta qo‘shni Ko‘rfaz mamlakatlarida safarda bo‘lgan AQSh Davlat kotibi Marko Rubio Vashington hech qanday boj yoki yig‘imlarga rozi emasligini ta’kidladi.