Уммон Ҳормуз бўғозида ҳужумга учраган танкер экипажини эвакуация қилди

Панама байроғи остида сузган танкер сешанба куни Уммоннинг Лимах порт шаҳрида 9 денгиз мили, яъни қарийб 17 километр узоқликда ҳужумга учраган. Зарба оқибатида кемада ёнғин чиққан.

Эвакуация қилинган экипаж аъзолари Мусандам губернаторлигидаги Хасаб шаҳри шифохонасига олиб борилиб, тиббий ёрдам кўрсатилган.

Ҳозирча ҳужум учун жавобгарликни ҳеч бир гуруҳ ўз зиммасига олмаган.

Ҳиндистон Ташқи ишлар вазирлиги маълумотига кўра, кемадаги 19 экипаж аъзосидан камида 12 нафари жароҳатланган. Уларнинг 11 нафари Ҳиндистон фуқаролари. Жами экипажнинг 17 нафари ҳам ҳиндистонлик бўлган.

Ҳиндистон ҳукумати минтақадаги кемаларга қарши ҳужумлардан жиддий хавотир билдириб, бундай ҳодисаларни зудлик билан тўхтатишга чақирди.

Маълумотларга кўра, сўнгги бир ҳафта ичида Ҳормуз бўғозида танкерлар билан боғлиқ яна камида еттита ҳодиса қайд этилган.

Ҳужумларга қарамай, Яқин Шарқдан нефть экспорти урушдан олдинги даражага қайтган. Kpler компаниясининг дастлабки маълумотларига кўра, 30 сентябрда минтақа хом нефть экспортининг етти кунлик ўртача ҳажми кунига 18,3 миллион баррелни ташкил этган. Урушдан олдинги 12 ойда бу кўрсаткич ўртача 18 миллион баррел бўлган.

Шу билан бирга, нефть нархи юқорилигича қолмоқда. Сешанба куни Brent маркали нефть фьючерслари бир баррели учун 101,51 долларга етган. Уруш бошланишидан бир кун олдин эса бу кўрсаткич 72,48 доллар эди.