Ироқ ҳукумати коррупцияга қарши муросасиз кураш бошлади

Ироқда коррупцияга қарши йирик тергов доирасида 47 нафар шахс қўлга олинди. Улар орасида парламент депутатлари, юқори лавозимли амалдорлар ва давлат хизматчилари бор.

Тинтувлар давомида депутат Ҳинд ал-Аббосийнинг уйидан тахминан 57 миллион доллар нақд пул ва 27 килограмм соф олтин топилган.

ОАВ хабар қилишича, мансабдор аёлнинг хонадонидан олтиндан тайёрланган ич кийимлар ҳам мусодара қилинган.

Гарчи ал-Аббосий қонунчилик палатасининг расмий веб-сайтида парламент аъзоси сифатида кўрсатилган бўлса-да, Ироқ расмийлари ҳодиса бўйича тафсилотларни ҳозирча тасдиқлагани йўқ.

Рейдлар давом этмоқда

Хавфсизлик кучлари томонидан Бағдод ва бошқа бир қатор ҳудудларда рейдлар ўтказилиб, тизимли коррупция ҳамда давлат маблағларини ўзлаштиришда гумон қилинган давлат хизматчилари нишонга олинди.

Хусусан, собиқ нефть вазири ўринбосари бўйича суриштирув натижасида қуйидагилар мусодара қилинган:

• 10 миллион АҚШ доллари;
• 3 миллиард Ироқ динори;
• катта миқдордаги олтин тақинчоқлар;
• 40 га яқин кўчмас мулк объекти;
• қурол-яроғ ва ўқ-дорилар захираси.

Бош вазир Али ал-Зайдий ҳукумат коррупцияга қарши муросасиз курашаётганини таъкидлади.

Унинг огоҳлантиришича, давом этаётган тергов жараёни ўзгарувчан бўлиб, яқин кунларда бошқа гумонланувчиларни ҳам қамраб олади.