Швейцарияда Гулнора Каримовага оид жиноят иши тугатилди

Швейцария суди 27 июль куни Lombard Odier хусусий банкини ноқонуний даромадларни ювишнинг олдини олиш бўйича зарур чораларни кўрмагани учун 3 миллион Швейцария франки (3,68 миллион доллар) миқдорида жаримага тортди.

Reuters маълум қилишича, суд шу билан бирга Ўзбекистоннинг биринчи президенти Ислом Каримовнинг қизи Гулнора Каримовага нисбатан Швейцарияда юритилган мазкур жиноят ишини тугатган.

Прокурорлар Каримовани пора олиш ҳамда 2005–2013 йилларда Швейцария банк ҳисобларига юзлаб миллион доллар ўтказган, "Office" номи билан танилган жиноий тузилмани бошқарганликда айблаган эди.

Женевада жойлашган Lombard Odier банки ва унинг собиқ ходими эса жиноий фаолиятдан олинган даромадларни яширишга кўмаклашганликда айбланган. Суд жараёни жорий йил апрель ойида бошланган.

Суд қарорига мувофиқ, банк 400 миллион Швейцария франкидан ортиқ активларни мусодара қилиш ҳақидаги қарорга ҳам дуч келди. Банкнинг собиқ ҳисоб менежерига эса 24 ойлик шартли қамоқ жазоси тайинланди.

Lombard Odier баёнотида мазкур иш 2012 йилда банкнинг ўзи Швейцария ҳуқуқни муҳофаза қилувчи органларига шубҳали операциялар ҳақида хабар берганидан кейин бошлангани айтилди. Банк ўша вақтда пул ювишга қарши ички назорат тизими етарлича кучли бўлганини таъкидлаб, суд қарори устидан шикоят қилишини билдирди.

Ҳозирда 54 ёшли Гулнора Каримова ўзига қўйилган қонунбузарлик айбловларини рад этиб келади. У Ўзбекистонда коррупция, талон-торож ва товламачилик билан боғлиқ ишлар бўйича судланган ва 2019 йилда уй қамоғи шартларини бузгани учун қамоққа олинган.

Суд маълум қилишича, Каримовага нисбатан айнан ушбу иш уни жавобгарликка тортиш муддати тугагунига қадар озод қилиниши ёки Швейцарияга топширилиши эҳтимоли мавжуд эмаслиги сабабли тугатилган. Шунингдек, Россияда яшовчи яна бир айбланувчига нисбатан ҳам иш Швейцарияга кела олмагани боис тўхтатилган.

Суд банк ва унинг собиқ ходимига нисбатан тайинланган жазолар ҳам жиноят содир этилганига кўп йиллар ўтгани инобатга олиниб енгиллаштирилганини билдирди. 2011 йил июлигача бўлган айрим эпизодлар бўйича айбловлар эса жавобгарликка тортиш муддати тугагани сабаб бекор қилинди.