Iroq hukumati korrupsiyaga qarshi murosasiz kurash boshladi

Iroqda korrupsiyaga qarshi yirik tergov doirasida 47 nafar shaxs qo‘lga olindi. Ular orasida parlament deputatlari, yuqori lavozimli amaldorlar va davlat xizmatchilari bor.

Tintuvlar davomida deputat Hind al-Abbosiyning uyidan taxminan 57 million dollar naqd pul va 27 kilogramm sof oltin topilgan.

OAV xabar qilishicha, mansabdor ayolning xonadonidan oltindan tayyorlangan ich kiyimlar ham musodara qilingan.

Garchi al-Abbosiy qonunchilik palatasining rasmiy veb-saytida parlament a’zosi sifatida ko‘rsatilgan bo‘lsa-da, Iroq rasmiylari hodisa bo‘yicha tafsilotlarni hozircha tasdiqlagani yo‘q.

Reydlar davom etmoqda

Xavfsizlik kuchlari tomonidan Bag‘dod va boshqa bir qator hududlarda reydlar o‘tkazilib, tizimli korrupsiya hamda davlat mablag‘larini o‘zlashtirishda gumon qilingan davlat xizmatchilari nishonga olindi.

Xususan, sobiq neft vaziri o‘rinbosari bo‘yicha surishtiruv natijasida quyidagilar musodara qilingan:

• 10 million AQSh dollari;
• 3 milliard Iroq dinori;
• katta miqdordagi oltin taqinchoqlar;
• 40 ga yaqin ko‘chmas mulk obyekti;
• qurol-yarog‘ va o‘q-dorilar zaxirasi;

Bosh vazir Ali al-Zaydiy hukumat korrupsiyaga qarshi murosasiz kurashayotganini ta’kidladi.

Uning ogohlantirishicha, davom etayotgan tergov jarayoni o‘zgaruvchan bo‘lib, yaqin kunlarda boshqa gumonlanuvchilarni ham qamrab oladi.