Исроил президенти Исаак Герцог Қозоғистон президенти Қосим-Жомарт Тоқаевнинг таклифига биноан Остонага келди. У Қозоғистонни “жаҳон миқёсида аҳамиятга эга мамлакат” деб атади.
Х ижтимоий тармоғида эълон қилинган баёнотда Герцог Исроил ҳамда Қозоғистон ўртасидаги узоқ йиллик шерикликни юқори баҳолаб, мамлакатнинг бетакрор манзаралари, маданияти ва гўзаллиги кўп йиллардан буён чуқур ҳайрат уйғотиб келишини таъкидлади.
У Қозоғистонни “жаҳон миқёсида аҳамиятга эга мамлакат” деб атаб, иқтисодий, илмий ва технологик соҳаларда кенгайиб бораётган ҳамкорликни қайд этган ҳолда, икки давлат ўртасидаги мустаҳкамланиб бораётган алоқаларга урғу берди.
“Исроил ва Қозоғистон ўртасидаги узоқ йиллик шериклик ҳар икки давлат учун катта аҳамият касб этади, ўртамиздаги мустаҳкамланиб бораётган ришталар эса ҳар икки халқ фаровонлигига ҳисса қўшмоқда”, - деди Исаак Герцог.
Шунингдек, у Қозоғистоннинг ўтган йили “Иброҳим келишувлари”га қўшилиш қарори мусулмонлар, насронийлар ва яҳудийлар ўртасидаги ҳамкорлик руҳини акс эттиришини таъкидлади.
Қозоғистон 1992 йилдан бери Исроил билан дипломатик алоқаларга эга, шу боис унинг келишувларга қўшилиш қарори асосан рамзий аҳамият касб этади.
Ташриф давомида Герцог икки томонлама алоқаларни чуқурлаштириш мақсадида Тоқаев ва бошқа юқори мартабали расмийлар, шунингдек, маҳаллий яҳудий жамоаси вакиллари билан учрашиши кутилмоқда.
