Isroil prezidenti Isaak Gersog Qozog‘iston prezidenti Qosim-Jomart Toqayevning taklifiga binoan Ostonaga keldi. U Qozog‘istonni “jahon miqyosida ahamiyatga ega mamlakat” deb atadi.
X ijtimoiy tarmog‘ida e’lon qilingan bayonotda Gersog Isroil hamda Qozog‘iston o‘rtasidagi uzoq yillik sheriklikni yuqori baholab, mamlakatning betakror manzaralari, madaniyati va go‘zalligi ko‘p yillardan buyon chuqur hayrat uyg‘otib kelishini ta’kidladi.
U Qozog‘istonni “jahon miqyosida ahamiyatga ega mamlakat” deb atab, iqtisodiy, ilmiy va texnologik sohalarda kengayib borayotgan hamkorlikni qayd etgan holda, ikki davlat o‘rtasidagi mustahkamlanib borayotgan aloqalarga urg‘u berdi.
“Isroil va Qozog‘iston o‘rtasidagi uzoq yillik sheriklik har ikki davlat uchun katta ahamiyat kasb etadi, o‘rtamizdagi mustahkamlanib borayotgan rishtalar esa har ikki xalq farovonligiga hissa qo‘shmoqda”, - dedi Isaak Gersog.
Shuningdek, u Qozog‘istonning o‘tgan yili “Ibrohim kelishuvlari”ga qo‘shilish qarori musulmonlar, nasroniylar va yahudiylar o‘rtasidagi hamkorlik ruhini aks ettirishini ta’kidladi.
Qozog‘iston 1992-yildan beri Isroil bilan diplomatik aloqalarga ega, shu bois uning kelishuvlarga qo‘shilish qarori asosan ramziy ahamiyat kasb etadi.
Tashrif davomida Gersog ikki tomonlama aloqalarni chuqurlashtirish maqsadida Toqayev va boshqa yuqori martabali rasmiylar, shuningdek, mahalliy yahudiy jamoasi vakillari bilan uchrashishi kutilmoqda.
