Италия Apple’га 98,6 миллион евро жарима солди

Антимонополия қўмитасининг ёзма баёнотига кўра, Apple Inc., Apple Distribution International Ltd. ва Apple Italia S.r.l. компанияларига нисбатан жами 98 635 416 евро жарима қўлланилган.

Баёнотда таъкидланишича, Италия антимонополь органи Европа комиссияси, бошқа миллий антимонополия идоралари ҳамда Италия маълумотларни ҳимоя қилиш агентлиги билан ҳамкорликда ўтказилган кенг қамровли текширув натижасида Apple’нинг 2021 йил апрел ойидан бошлаб iOS операцион тизимидаги App Store орқали тарқатиладиган учинчи томон иловалар ишлаб чиқувчиларига иловаларни кузатиш шаффофлиги сиёсати (ATT)ни мажбурий тарзда жорий этганини аниқлаган.

Ушбу қоидалар рақобатни чекловчи деб баҳоланган. Қўмита фикрича, Apple мазкур бозорда App Store орқали «ҳаддан ташқари доминант» мавқега эга.

Текширув давомида ATT сиёсати шартлари Apple томонидан бир томонлама тарзда жорий этилгани, бу эса компаниянинг тижорий ҳамкорлари манфаатларига зарар етказиши, шунингдек, маълумотларни ҳимоя қилиш бўйича эълон қилинган мақсадларга нисбатан номутаносиб экани аниқланган.