Жанубий Кореяга янги президент сайланди

Қайд этилишича, Ли Чже Мён 2022 йилда президентлик сайловида бор-йўғи 1 фоиздан кам фарқ билан Юн Сок Ёлдан мағлубиятга учраган. Орадан икки йил ўтиб, у яна сиёсат майдонига чиқди — бу сафар ҳарбий ҳолат ва сиёсий инқироз фонида халқ ишончини қозониб, давлат раҳбарига айланди.

"Овозларнинг 95 фоизи саналганда, Ли 48,83 фоиз овоз билан етакчилик қилаётган эди. Унинг асосий рақиби, Халқ кучи партияси (ППП) номзоди Ким Мун Су эса 42,03 фоиз овоз билан ортда қолмоқда. Сайловда 44,39 миллион сайловчидан 35,24 миллион нафари иштирок этди — бу 79,4 фоизлик кўрсаткич бўлиб, сўнгги ўн йилликдаги энг юқори қатнашув даражаси сифатида қайд этилди", дейилади хабарда.

"Исённи енгамиз": янги президентнинг дастлабки ваъдалари

Сеулдаги Миллий Ассамблея яқинида тарафдорлари олдида сўзлаган нутқида Ли Жаэ Мюнг собиқ президент Юн томонидан жорий этилган ҳарбий ҳолатга ишора қилиб, демократик тизимни қайта тиклашга ваъда берди:

Foto: YONHAP

"Мен демократия тикланадиган, халқ суверен ҳисобланган ва барча биргаликда яшайдиган жамиятни қуриш вазифасини ўз зиммамга оламан.

Президентликка сайланганим заҳоти иқтисодни тиклаш ва халқ турмушини яхшилашга бутун кучимни сафарбар қиламан, деган у рафиқаси Ким Хе Гён билан саҳнада туриб.

"Халқ кучи партияси" номзоди Ким Мун Су мағлубиятни тан олиб, рақибини табриклади:

"Халқ танловини камтарлик билан қабул қиламан ва Ли Чже Мённи сайловдаги ғалабаси билан табриклайман", деди у партия штаб-квартирасида ўтказилган матбуот анжуманида.

Ким кампания давомида Лиънинг давом этаётган суд ишлари, коррупция айбловлари ва кескин сиёсий услубини танқид қилиб, "диктатурасиз келажак" ваъда қилган эди. Бироқ бу стратегия кутилган натижани бермади.

ППП вакиллари сайлов натижаларидан норози бўлмоқда.

"Биз озгина ортда ёки олдинда бўлишимиз мумкин деб ўйлагандик. Аммо натижалар бу қадар катта фарқ билан чиққани жуда оғир бўлди", деган Партия сайлов штаби раҳбари На Кёнг Вон KBS телеканалига берган интервьюсида.

Юннинг 2024 йил декабрида ҳарбий ҳолат эълон қилгани жамиятда чуқур норозиликларга сабаб бўлган, парламент эса уни импичмент қилишга мажбур бўлган эди. Шундан сўнг, навбатдан ташқари сайлов тайинланди. Бу вақт ичида мамлакат иқтисоди издан чиқди, АҚШ билан савдо алоқалари таранглашди, Шимолий Корея эса ядровий дастурини фаол давом эттирди.

Ли Чже Мёнг энди фақат собиқ режимни ортда қолдириш эмас, балки мамлакатни ички бўлиниш, ишонч инқирози ва иқтисодий қийинчиликлардан олиб чиқиш вазифасига дуч келмоқда. Уни халқ сайлади — энди эса у халқ кутган демократик ва иқтисодий ислоҳотларни амалга ошириш учун тарихий имкониятга эга.