Janubiy Koreyaga yangi prezident saylandi

Qayd etilishicha, Li Chje Myon 2022 yilda prezidentlik saylovida bor-yoʻgʻi 1 foizdan kam farq bilan Yun Sok Yoldan magʻlubiyatga uchragan. Oradan ikki yil oʻtib, u yana siyosat maydoniga chiqdi — bu safar harbiy holat va siyosiy inqiroz fonida xalq ishonchini qozonib, davlat rahbariga aylandi.

"Ovozlarning 95 foizi sanalganda, Li 48,83 foiz ovoz bilan yetakchilik qilayotgan edi. Uning asosiy raqibi, Xalq kuchi partiyasi (PPP) nomzodi Kim Mun Su esa 42,03 foiz ovoz bilan ortda qolmoqda. Saylovda 44,39 million saylovchidan 35,24 million nafari ishtirok etdi — bu 79,4 foizlik koʻrsatkich boʻlib, soʻnggi oʻn yillikdagi eng yuqori qatnashuv darajasi sifatida qayd etildi", deyiladi xabarda.

"Isyonni yengamiz": yangi prezidentning dastlabki vaʼdalari

Seuldagi Milliy Assambleya yaqinida tarafdorlari oldida soʻzlagan nutqida Li Jae Myung sobiq prezident Yun tomonidan joriy etilgan harbiy holatga ishora qilib, demokratik tizimni qayta tiklashga vaʼda berdi:

Foto: YONHAP

"Men demokratiya tiklanadigan, xalq suveren hisoblangan va barcha birgalikda yashaydigan jamiyatni qurish vazifasini oʻz zimmamga olaman.

Prezidentlikka saylanganim zahoti iqtisodni tiklash va xalq turmushini yaxshilashga butun kuchimni safarbar qilaman, degan u rafiqasi Kim Xe Gyon bilan sahnada turib.

"Xalq kuchi partiyasi" nomzodi Kim Mun Su magʻlubiyatni tan olib, raqibini tabrikladi:

"Xalq tanlovini kamtarlik bilan qabul qilaman va Li Chje Myonni saylovdagi gʻalabasi bilan tabriklayman", dedi u partiya shtab-kvartirasida oʻtkazilgan matbuot anjumanida.

Kim kampaniya davomida Liʼning davom etayotgan sud ishlari, korrupsiya ayblovlari va keskin siyosiy uslubini tanqid qilib, "diktaturasiz kelajak" vaʼda qilgan edi. Biroq bu strategiya kutilgan natijani bermadi.

PPP vakillari saylov natijalaridan norozi boʻlmoqda.

"Biz ozgina ortda yoki oldinda boʻlishimiz mumkin deb oʻylagandik. Ammo natijalar bu qadar katta farq bilan chiqqani juda ogʻir boʻldi", degan Partiya saylov shtabi rahbari Na Kyong Von KBS telekanaliga bergan intervyusida.

Yunning 2024 yil dekabrida harbiy holat eʼlon qilgani jamiyatda chuqur noroziliklarga sabab boʻlgan, parlament esa uni impichment qilishga majbur boʻlgan edi. Shundan soʻng, navbatdan tashqari saylov tayinlandi. Bu vaqt ichida mamlakat iqtisodi izdan chiqdi, AQSh bilan savdo aloqalari taranglashdi, Shimoliy Koreya esa yadroviy dasturini faol davom ettirdi.

Li Chje Myong endi faqat sobiq rejimni ortda qoldirish emas, balki mamlakatni ichki boʻlinish, ishonch inqirozi va iqtisodiy qiyinchiliklardan olib chiqish vazifasiga duch kelmoqda. Uni xalq sayladi — endi esa u xalq kutgan demokratik va iqtisodiy islohotlarni amalga oshirish uchun tarixiy imkoniyatga ega.