Нетанъяҳу ғазоликларни Африкага кўчирмоқчи

Нашрнинг ёзишича, Исроилнинг бу ҳаракати 22 ойлик ҳужум натижасида вайрон бўлган ҳудудидан аҳолини оммавий кўчиришнинг бир қисмидир.

Исроилнинг Судан билан қилаётган музокараларидан хабардор 6 киши The Associated Прессъга бу келишув ҳақиқатдан ҳам олиб бораётганлигини тасдиқлаган. Бироқ музокаралар ҳозирда қайси босқичда эканлигини айтишмаган. Агар мазкур режа амалга ошса уруш азобини ва очарчиликни бошидан кечирган одамларни кўчириш керак бўлади ва бу инсон ҳуқуқлари билан боғлиқ янги муаммоларни келтириб чиқаради.

Исроил бош вазири Бинямин Нетанъяҳу АҚШ президенти Доналд Трампнинг Ғазо аҳолисининг катта қисмини кўчириш ғоясини, ўзи "ихтиёрий миграция" деб атаётган усул орқали амалга оширмоқчи эканини айтмоқда. Исроил бошқа Африка давлатларига ҳам худди шундай кўчириш таклифларини билдирган.

“Менимча, ҳатто мен билган уруш қонунларига кўра ҳам, тўғри йўл аҳолининг кетишига рухсат бериш, сўнгра у ерда қолган душманга қарши бор кучингиз билан курашишдир”, — деган Нетанъяху Исроил телевидениесига берган интервьюсида.

У интервью давомида фаластинликларни Жанубий Суданга кўчириш бўйича умуман гапирмаган.

Фаластинликлар, инсон ҳуқуқларини ҳимоя қилувчи ташкилотлар ва халқаро ҳамжамиятнинг кўп қисми бу таклифларни халқаро ҳуқуқни бузиб, мажбурий кўчириш режаси сифатида рад этмоқда.

Жанубий Судан учун бундай келишув Яқин Шарқда деярли рақибсиз ҳарбий кучга айланган Исроил билан яқинроқ алоқалар ўрнатишга ёрдам бериши мумкин. Бу, шунингдек, Ғазо аҳолисини кўчириш ғоясини февраль ойида илгари сурган, аммо сўнгги ойларда ундан воз кечганга ўхшаган Трампга яқинлашиш имконияти ҳамдир.

Жанубий Судан Ташқи ишлар вазирлиги ўз баёнотида Исроил билан фаластинликларни кўчириш масаласида музокаралар олиб бораётгани ҳақидаги хабарларни бутунлай асоссиз эканлигини маълум қилди.

"Бу каби даъволар ҳеч қандай асосга эга эмас ва Жанубий Судан Республикаси ҳукуматининг расмий позицияси ёки сиёсатини акс эттирмайди”, — дейилади вазирлик баёнотида.

АҚШ Давлат департаменти вакили эса хусусий дипломатик суҳбатлар ҳақида изоҳ беришдан бош тортмоқда.