«Ғазоликларнинг аҳволи оғир»: Люис Ҳемилтон Исроилга мурожаат қилди

Формула-1 пойгаларининг етти карра чемпиони Льюис Ҳемилтон Исроилни Мисрдан Ғазога инсонпарварлик ёрдами олиб кирилиши учун «Рафаҳ» назорат-ўтказиш пунктини қайта очишга чақирди. Ҳозирда ҳудудда кучли ёмғирлар ва вақтинчалик чодир-лагерларни сув босиши оқибатида шароит оғирлашган.

Ушбу чақириқ чоршанба куни — британиялик F1 пойгачисининг Ғазо билан чегарадош Миср шимолидаги Ал-Ариш шаҳрига ташрифидан бир кун ўтиб янгради. У ерда Ҳемилтон Миср Қизил Ярим ой жамияти томонидан қамалган анклавга юборишга тайёрланган инсонпарварлик ёрдамини кўздан кечирган эди.

«Ғазо ва Фаластиндаги одамлар шу қадар танг аҳволдаки, уларнинг ушбу ёрдамга бўлган эҳтиёжи айни пайтдагидан ортиқ бўлиши амримаҳол. Шу сабабли биз Исроилга жиддий босим ўтказишимиз ва ушбу ёрдам уларга етиб боришини таъминлаш учун биргаликда ҳаракат қилишимиз зарур», — деб ёзди Ҳемилтон ижтимоий тармоқдаги постида.

Ҳемилтоннинг таъкидлашича, бир нечта ҳудудда энг зарур маҳсулотлар сақланаётган омборлар мавжуд, бироқ чегаралар ёпиқлиги сабабли бу таъминот унга муҳтож фаластинликларга етиб бормайapти.

«Адолатсизлик»

Ҳемилтоннинг Instagram саҳифасидаги постда унинг Миср Қизил Ярим Ой жамияти кўнгиллилари ва ходимлари билан учрашгани акс этган.

«Исроилнинг Ғазода сўнгги уч йилдан бери олиб бораётган геноциди даҳшатли. Одамларнинг эркинлик, хавфсизлик ва ўз қадр-қимматидан маҳрум қилиниши — адолатсизликдир. Ҳеч бир инсонга унинг ҳаёти бошқаларникидан қадрсизроқдек муносабатда бўлмаслик керак», — деди Ҳемилтон.

Исроил Бош вазири Бинямин Нетаньяҳу эса Исроил Ғазо секторига қишки зарур маҳсулотлар киришини кечиктирмоқда, деган айбловларни рад этди.

150 минг чодир чегара ортида

БМТнинг 11 ноябрь куни маълум қилишича, гуманитар ҳамкорлар ва аъзо давлатлар харид қилган 150 мингдан зиёд чодир чегара ортида қолмоқда. Уларни Ғазо секторига олиб кириш учун Исроил рухсати керак.

Ташкилотнинг гуманитар масалалар бўйича раҳбари Том Флетчер Исроилда янги ҳукумат шаклланишини кутиш Ғазога қиш мавсуми учун зарур воситаларни етказишдаги кечикишлар учун «ўринли баҳона эмас»лигини билдирди.

Аввалроқ Ғазо секторидаги 70 мингга яқин чодирни сув босгани ҳақида хабар бергандик.