Ғазода ҳарорат совимоқда, гуманитар ёрдам эса киролмаяпти

Кучли ёмғир ва сув тошқинлари Ғазо секторидаги минглаб ўз ватанида қочқинга айланган фаластинликларнинг шундоғам оғир аҳволини баттарлаштирмоқда. 

Расмийларнинг маълум қилишича, 70 мингга яқин чодирни сув босган, бу эса 350 минг атрофидаги аҳолига таъсир кўрсатмоқда. Баъзи қочқинлар лагерларида сув бир ярим метргача кўтарилган. 

Ҳозирда кўрпа-тўшак, қишки кийим-кечак ва иситиш воситаларига эҳтиёж катта, бироқ Исроил чекловлари туфайли ҳудудга гуманитар ёрдам етарли ҳажмда киролмаяпти.

Аввалроқ Исроилдаги сайловлар якунланмагунча ижобий ўзгаришларга эришиш қийин бўлиши айтилганди. Энди эса Тел-Авивда ҳукумат шаклланишини кутиш талаб қилинмоқда.

Бирлашган Миллатлар Ташкилоти Бош котибининг гуманитар масалалар бўйича ўринбосари Том Флетчер бундай пайсалга солишларни зудлик билан тўхтатишга ҳамда Исроилни Ғазога олиб борувчи барча ўтиш йўлларини очишга чақирди.

Ҳозирда Ғазо чегараси ташқарисида 150 мингта чодир мавжуд. Уларни зудлик билан ҳудудга олиб кириш зарур. Ғазода фойдаланилаётган юпқа чодирлар эса кучли ёмғир ва бўронларга бардош бера олмайди.

Сўнгги бир ҳафта ичида 10 минг нафар болага қишки кийим-кечак ва иссиқликни сақлайдиган кўрпалар етказиб берилган. Шунингдек, Ғазога 50 мингта қум тўлдирилган қоп олиб кирилган. Бироқ бу ёрдам етарли эмас. Оилалар учун мўлжалланган мустаҳкам чодирларни ҳам етказиш керак.

Бунинг учун барча чегара ўтиш пунктлари очилиши, нодавлат ташкилотларга Ғазода ишлашга рухсат берилиши лозим.

Келгуси қиш давомида Ғазо аҳолисининг учдан икки қисми – 1,4 миллион киши очлик инқирозига дуч келиши мумкин. Зарур ёрдам воситаларини етказиш кечикса, бу кўрсаткич янада ошади. Сўнгги икки йил давомида гуманитар ёрдам учун ажратиладиган маблағларнинг кескин қисқартирилиши ҳам вазиятни оғирлаштирмоқда.

Халқаро ҳамжамият Ғазога гуманитар ёрдам етказиш имкониятларини кенгайтириш талабини қўллаб-қувватламоқда. Хусусан, Тинчлик кенгаши ҳамда G7 давлатлари Ғазога гуманитар ёрдамни тўлиқ етказиш зарурлигини таъкидлаган.