Норвегия Россиянинг “Профессор Молчанов” номли кемасини ҳибсга олди

Норвегия расмийлари 2-сентябрь куни Свалбард архипелагининг Арктика ҳудудидаги Баренсбург портида Россияга тегишли “Профессор Молчанов” номли давлат кемасини ҳибсга олди. Бу ҳақда Euronews хабар берди.

Баренсбург – Норвегия ҳудудидаги рус кўмир кончилари шаҳарчаси бўлиб, у 1920-йилги Шпицберген шартномасининг меросидир. Ушбу шартнома архипелаг устидан Норвегия суверенитетини тасдиқлаш билан бирга, уни имзолаган давлатларга, жумладан, Россияга бу ерда тижорий фаолият юритиш учун тенг ҳуқуқлар беради.

Ҳукумат органлари Украинанинг “Нафтогаз” давлат энергетика компаниясининг аризаси асосида ҳаракат қилган. Компания Россия 2014-йилда Қримни ноқонуний аннексия қилганида тортиб олган энергетика активлари учун товон пули ундиришга уринмоқда.

Кема Норвегиянинг Норд-Тромс ва Сеня округ судининг 31-август куни чиқарган қарорига асосан ҳибсга олинган.

Маҳаллий ижро этувчи орган сифатида операцияни бажарган Шпицберген губернатори Ларс Фаусенинг айтишича, кемага ҳозирги жойлашган ўрнини тарк этишга рухсат йўқ. Кема бортидаги йўловчилар масаласи билан Норвегия ҳукумати алоҳида шуғулланмоқда.

Кремль вазият бўйича изоҳ бермади.

4,2 миллиард долларлик ҳисоб

Гаагадаги Доимий арбитраж суди 2023-йилда Россия “Нафтогаз” ва унга алоқадор олтита компаниянинг Қримдаги активларини, жумладан, газ конлари, қувурлар ҳамда Қора денгиздаги “Чорноморнафтогаз” компаниясини ноқонуний равишда эгаллаб олгани учун уларга товон пули тўлаши керак, деган қарорга келган.

Фоизлар ва харажатларни ҳисобга олмаганда, асосий қарз миқдори қарийб 4,22 миллиард долларни ташкил этади. Фоизлар ва бошқа харажатлар билан эса қарийб 5 миллиард долларга етиши мумкин.

Россия тўловни амалга оширишдан бош тортган. Шу сабабли “Нафтогаз” Россиянинг тижорий мулклари мавжуд бўлган мамлакатлардаги судларга мурожаат қилмоқда.

“Россия халқаро арбитраж қарорини бажаришдан бош тортиб, жавобгарликдан қочиб қутула олмайди”, – деди “Нафтогаз” компаниясинг бош директори вазифасини бажарувчи Сергий Федоренко.

Федоренко компания пул тўланмагунча дунё бўйлаб Россия активларини “овлаш”да давом этишини қўшимча қилди.

Арктика операцияси ягона амалиёт эмас. Қрим иши бўйича суд қарорини ижро эттириш жараёнлари қарийб ўнта юрисдикцияда давом этмоқда. Россиянинг Финляндия ва Франциядаги активлари аллақачон мусодара қилинган.