Norvegiya Rossiyaning “Professor Molchanov” nomli kemasini hibsga oldi

Norvegiya rasmiylari 2-sentyabr kuni Svalbard arxipelagining Arktika hududidagi Barensburg portida Rossiyaga tegishli “Professor Molchanov” nomli davlat kemasini hibsga oldi. Bu haqda Euronews xabar berdi.

Barentsburg – Norvegiya hududidagi rus ko‘mir konchilar shaharchasi bo‘lib, u 1920-yilgi Shpitsbergen shartnomasining merosidir. Ushbu shartnoma arxipelag ustidan Norvegiya suverenitetini tasdiqlash bilan birga, uni imzolagan davlatlarga, jumladan, Rossiyaga bu yerda tijoriy faoliyat yuritish uchun teng huquqlar beradi.

Hukumat organlari Ukrainaning “Naftogaz” davlat energetika kompaniyasining arizasi asosida harakat qilgan. Kompaniya Rossiya 2014-yilda Qrimni noqonuniy anneksiya qilganida tortib olgan energetika aktivlari uchun tovon puli undirishga urinmoqda.

Kema Norvegiyaning Nord-Troms va Senya okrug sudining 31-avgust kuni chiqargan qaroriga asosan hibsga olingan.

Mahalliy ijro etuvchi organ sifatida operatsiyani bajargan Shpitsbergen gubernatori Lars Fausening aytishicha, kemaga hozirgi joylashgan o‘rnini tark etishga ruxsat yo‘q. Kema bortidagi yo‘lovchilar masalasi bilan Norvegiya hukumati alohida shug‘ullanmoqda.

Kreml vaziyat bo‘yicha izoh bermadi.

4,2 milliard dollarlik hisob

Gaagadagi Doimiy arbitraj sudi 2023-yilda Rossiya “Naftogaz” va unga aloqador oltita kompaniyaning Qrimdagi aktivlarini, jumladan, gaz konlari, quvurlar hamda Qora dengizdagi “Chornomornaftogaz” kompaniyasini noqonuniy ravishda egallab olgani uchun ularga tovon puli to‘lashi kerak, degan qarorga kelgan.

Foizlar va xarajatlarni hisobga olmaganda, asosiy qarz miqdori qariyb 4,22 milliard dollarni tashkil etadi. Foizlar va boshqa xarajatlar bilan esa qariyb 5 milliard dollarga yetishi mumkin.

Rossiya to‘lovni amalga oshirishdan bosh tortgan. Shu sababli “Naftogaz” Rossiyaning tijoriy mulklari mavjud bo‘lgan mamlakatlardagi sudlarga murojaat qilmoqda.

“Rossiya xalqaro arbitraj qarorini bajarishdan bosh tortib, javobgarlikdan qochib qutula olmaydi”, – dedi “Naftogaz” kompaniyasing bosh direktori vazifasini bajaruvchi Sergiy Fedorenko.

Fedorenko kompaniya pul to‘lanmaguncha dunyo bo‘ylab Rossiya aktivlarini “ovlash”da davom etishini qo‘shimcha qildi.

Arktika operatsiyasi yagona amaliyot emas. Qrim ishi bo‘yicha sud qarorini ijro ettirish jarayonlari qariyb o‘nta yurisdiksiyada davom etmoqda. Rossiyaning Finlyandiya va Fransiyadagi aktivlari allaqachon musodara qilingan.