Ўзбекистон Афғонистонга 200 млн долларлик инвестиция киритмоқчи

Кеча, 2 март куни Сурхондарё вилояти Термиз шаҳрида Ўзбекистон – Афғонистон қўшма савдо форуми ўтказилди. Форумда инвестициялар, савдо ва саноат вазири Лазиз Қудратов ва Афғонистон саноат ва савдо вазири вазифасини бажарувчи Нуриддин Азиз иштирок этган. 

Учрашув давомида икки томон Афғонистондаги ўзбек сармоялари — 200 миллион доллардан ортиқ қийматга эга сабзавот ва мева қайта ишлаш заводларини қуриш, Ҳайратон портида иқтисодий ва савдо мажмуасини яратиш, шунингдек, икки давлат савдогарлари учун узоқ муддатли бизнес визаларини осонлаштириш каби мавзуларни муҳокама қилинган. 

Хабарда айтилишича, Ўзбекистоннинг Савдо-саноат палатаси ўзини Афғонистоннинг асосий иқтисодий ҳамкорларидан бири деб билишини ва бундан кейин икки давлат ўртасидаги савдо-иқтисодий алоқалар мустаҳкамланиб бориши муҳимлигини маълум қилган.

"Озиқ-овқат маҳсулотларини ишлаб чиқариш ва қайта ишлаш, паррандачилик, фармацевтика саноати, цемент ва қурилиш материалларини ишлаб чиқариш, боғдорчилик, мева ва сабзавотларни қайта ишлаш каби соҳаларда дастлабки 200 миллион доллардан ортиқ сармоя киритиш масалалари Балх, Саманган ва Қундуз вилоятларида муҳокама қилинди" дейди Афғонистон Саноат ва савдо вазирлиги вакили Ахундзода Абдул Салам Жавад. 

Афғонистон Савдо ва инвестициялар палатаси аъзоси Ханжон Алокозайнинг айтишича, Афғонистон транспорт воситаларининг ҳаракатланиши учун икки томон ўртасида транспорт, логистика ва транзит харажатлари камайтирилиши керак. Афғонистонга бундай шароитлар яратиб берилганидан сўнг, улар Хитой, Россия ва Қозоғистон орқали транзит йўналишларини кенгайтириши мумкин. 

Маълумот учун, жорий йилнинг 22 февраль куни Афғонистон иқтисодий масалалар бўйича бош вазир ўринбосари Мулла Абдул Ғани Бародар бошчилигидаги делегация Ўзбекистонга ташриф буюрган эди. 3 март куни Ўзбекистон – Афғонистон вакилларининг учрашуви ҳам ҳам Афғонистон делегациясининг Ўзбекистонга ташрифи якунлари бўйича бўлиб ўтган.