Толибон ҳукумати давлат амалдорларига смартфонлардан фойдаланишни тақиқлади

Толибон ҳукумати давлат хизматчиларига бутун мамлакат бўйлаб смартфонлардан фойдаланишни тақиқлади. Ҳуқуқ фаоллари бу ҳаракат ахборот олиш имкониятини янада чеклаши мумкинлигидан хавотир билдиришган.

Reuters агентлиги кўрган суд қарорида айтилишича, 16 июндан бошлаб ҳарбий ва фуқаролик муассасаларининг барча мансабдор шахслари, жумладан, судьялар учун смартфонлардан фойдаланиш тақиқланади.

Буйруқда қоидабузарларнинг мобил телефонлари мажақланиши ва қонун бўйича жазоланиши қайд этилган.

Ҳукумат ходимларининг сўзларига кўра, чеклов расмий ишларга аллақачон тўсқинлик қилган, камида бир вилоят ҳокимлиги тақиқни зудлик билан жорий этишни бошлаган.

"Бунинг таъсири шу қадар жиддийки, кўплаб маъмурий жараёнлар деярли тўхтаб қолди, чунки авваллари аксарият расмий ишлар мобил телефонлар, WhatsApp ва электрон почта орқали бажарилар эди", — деди давлат ходимларидан бири.

Панжшир вилояти ҳокими баёнотида тақиқ идоранинг барча бўлинмаларида жорий этилишини маълум қилди.

Ҳуқуқ ҳимоячиларининг таъкидлашича, смартфонлар афғонлар учун таълим олиш, қонунбузарликларни ҳужжатлаштириш, шахсий мулоқот қилиш ва цензурасиз маълумотлардан фойдаланиш имконини берувчи саноқли воситалардан бири бўлиб қолмоқда.

Бу буйруқ “Толибон”нинг 2021 йил августда ҳокимиятга қайтганидан сўнг жамоат устидан назоратни кучайтириш йўлидаги навбатдаги қадами.

Ўшандан буён Толибон аёллар ва қизларга, ОАВга ва фуқаролик жамиятига нисбатан кенг қамровли чекловлар жорий қилди.

Қизларнинг ўрта мактаблар ва университетларда ўқиши тақиқланган, кўплаб аёллар ишдан четлатилган, фаоллар ва журналистлар эса қўрқитиш, ҳибсга олиш ҳамда цензура ҳолатлари ҳақида хабар берган.