БМТ Толибонни аёлларга нисбатан тазйиқларни бекор қилишга чақирди

БМТ Хавфсизлик Кенгаши 15 июнь куни бир овоздан резолюция қабул қилди. Унда Толибон аёлларга нисбатан репрессияларни зудлик билан бекор қилишга ҳамда Покистон трансчегаравий ҳужумлар уюштиришда айблаётган Афғонистондаги жангари гуруҳларга қарши курашишга чақирилган.

Резолюция БМТнинг Афғонистондаги сиёсий миссияси муддатини 2027 йил 17 июнгача узайтириб, унга гуманитар ёрдам етказилишини қўллаб-қувватлайди. Шунингдек, жинси, дини ёки этник келиб чиқишидан қатъи назар, аёллар, этник озчиликлар, ёшлар ва ногиронлиги бўлган шахсларнинг ҳеч қандай камситишларсиз тўлиқ иштирокидаги бошқарувни илгари суриш ваколатини беради.

Мазкур резолюция шу ой Ҳирот шаҳрида 30 нафар аёлнинг қатъий кийиниш қоидаларини бузганликда айбланиб ҳибсга олиниши ортидан қабул қилинди.

БМТнинг Афғонистондаги ёрдам миссияси (UNAMA) маълумотларига кўра, ҳибсга олишлар сабабли келиб чиққан норозилик намойишини Толибон полицияси куч билан тарқатиб юборган, натижада бир киши отиб ўлдирилган, бир неча киши жароҳатланган.

Толибон ҳаракати 2021 йилда Афғонистон бошқарувини қўлга олгандан сўнг аёллар ва қизларга нисбатан бошланғич мактабдан кейинги таълимни ҳамда кўплаб касбларни тақиқлаш каби кескин чекловлар жорий этди.

Покистон Афғонистонни қонли ҳужумлар уюштирувчи жангариларга бошпана берганликда айблайди, аммо буни инкор этиб келади Толибон.

Февраль ойида Афғонистон Покистоннинг ҳаво зарбаларига жавобан ҳужум қилганидан буён икки мамлакат ўртасидаги тўқнашувларда юзлаб одамлар ҳалок бўлди.

Покистоннинг БМТдаги элчиси Осим Аҳмаднинг сўзларига кўра, резолюцияда Афғонистонда халқаро тинчлик ва хавфсизликка таҳдид солишда давом этаётган террорчи гуруҳлар мавжудлигидан Кенгашнинг жиддий хавотири акс этган.

Шунингдек, янги резолюция UNAMAга Афғонистоннинг иқтисодий ривожланишига кўмаклашиш, тижорий ва молиявий фаолиятни осонлаштириш ҳамда афғон халқи манфаатлари йўлида Марказий банкка тегишли активларни қайтариш саъй-ҳаракатларини олиб боришга ваколат беради.