Покистон Афғонистонда ҳаво зарбалари уюштирди

28 июнь куни Покистон хавфсизлик кучлари Покистон-Афғонистон чегараси бўйлаб қуруқлик ва ҳаводан операциялар ўтказиб, камида 29 нафар жангарини йўқ қилди. Бу ҳақда Reuters хабар берди.

Толибон эса ўзининг чегарасига қилинган ҳаво ҳужумлари оқибатида ўнлаб одамлар ҳалок бўлганини маълум қилди.

Покистон расмийларининг баёноти

29 июнь куни эрталаб Покистон ахборот вазири Аттауллоҳ Тарар Х ижтимоий тармоғида қуруқликдаги ҳужумларда “Жамоат ул-Аҳрор”га алоқадор тўрт нафар жангари йўқ қилинганини маълум қилди. Мазкур гуруҳ Покистон Толибонининг бир бўлагидир.

Унинг қўшимча қилишича, Пактия, Пактика ва Кунардаги учта нишонга берилган ҳаво зарбалари оқибатида 25 нафар жангари ўлдирилиб, катта миқдордаги қурол-яроғ ва ўқ-дорилар йўқ қилинган.

Толибон муносабати

Покистоннинг ҳаво зарбалари натижасида ўнлаб одамлар ҳалок бўлди ва яраланди, деди Афғонистон Толибони матбуот котиби Забиуллоҳ Мужоҳид Х ижтимоий тармоғидаги хабарида.

“Ҳужумлар ўнлаб тинч аҳоли вакиллари, жумладан, аёллар ва болаларни нобуд қилди, баъзиларни жароҳатлади. Биз ушбу қўрқоқларча тажовузкорликни қоралаймиз. Бу – жиноят ва ваҳшийлик”, — деди Забиуллоҳ.

Тарар эса ўз хабарида Покистон сўнгги пайтларда содир этилган кўплаб терактларга жавоб қайтараётганини таъкидлади.

Шунингдек, 27 июнь куни Покистон ҳарбийлари “Жамоат ул-Аҳрор”нинг Карачидаги “ Sind Rangers” объектига уюштирган бомбали ва қуролли ҳужуми оқибатида уч нафар ҳарбий бўлинма хизматчиси ҳалок бўлгани ва тўрт нафари яраланганини маълум қилди.