Қамчибек Ташиев вақтинча чет элга жўнаб кетди

Бу ҳақда “Манас” халқаро аэропортида олинган видеони унинг яқин ҳамкори Ўткирбек Раҳмонов эълон қилди.

Маълум қилинишича, Ташиев чет элга учиб кетган, бироқ у қайси давлатга ва қандай мақсадда жўнагани расман очиқланмаган. Айрим хабарларда у Германияга йўл олган бўлиши мумкинлиги айтилмоқда.

Эслатиб ўтамиз, 10 февраль куни Қирғизистон президенти Садир Жапаров Ташиевнинг Миллий хавфсизлик давлат қўмитаси раиси сифатидаги ваколатларини муддатидан олдин тугатиш тўғрисидаги фармонни имзолаган эди.

Шунингдек, унинг ўринбосарлари — Даниэл Рисалиев, Қурбонбек Авазов, Элизар Сманов ҳамда Хавфсизлик кенгаши котиби Рустам Мамасодиқов ҳам лавозимидан озод этилди.

Бундан ташқари, Қирғизистон Жогорку Кенеши спикери ва бош прокурорнинг биринчи ўринбосари истеъфога чиққан. 

16 феврал куни эса табиий ресурслар, экология ва техник назорат вазири Медер Машиев, фавқулодда вазиятлар вазири Бообек Ажикеев ҳамда транспорт ва коммуникациялар вазири Абсаттар Сиргабаев ҳам лавозимидан озод этилгани маълум қилинди.