Qamchibek Tashiyev vaqtincha chet elga joʻnab ketdi

Bu haqda “Manas” xalqaro aeroportida olingan videoni uning yaqin hamkori Oʻtkirbek Rahmonov eʼlon qildi.

Maʼlum qilinishicha, Tashiyev chet elga uchib ketgan, biroq u qaysi davlatga va qanday maqsadda joʻnagani rasman ochiqlanmagan. Ayrim xabarlarda u Germaniyaga yoʻl olgan boʻlishi mumkinligi aytilmoqda.

Eslatib oʻtamiz, 10 fevral kuni Qirgʻiziston prezidenti Sadir Japarov Tashiyevning Milliy xavfsizlik davlat qoʻmitasi raisi sifatidagi vakolatlarini muddatidan oldin tugatish toʻgʻrisidagi farmonni imzolagan edi.

Shuningdek, uning oʻrinbosarlari — Daniel Risaliyev, Qurbonbek Avazov, Elizar Smanov hamda Xavfsizlik kengashi kotibi Rustam Mamasodiqov ham lavozimidan ozod etildi.

Bundan tashqari, Qirgʻiziston Jogorku Keneshi spikeri va bosh prokurorning birinchi oʻrinbosari isteʼfoga chiqqan. 

Kecha esa tabiiy resurslar, ekologiya va texnik nazorat vaziri Meder Mashiyev, favqulodda vaziyatlar vaziri Boobek Ajikeyev hamda transport va kommunikatsiyalar vaziri Absattar Sirgabayev ham lavozimidan ozod etilgani maʼlum qilindi.