Қирғизистон ўрмон қопламининг қарийб 90 фоизидан айрилди

Бу ҳақда «24.kg» мамлакатнинг Миллий мослашув режаси лойиҳасига таяниб хабар берди.

Ҳужжатда қайд этилишича, ўрмонларнинг қисқариши нафақат экологик муаммоларни кучайтирмоқда балки табиий офатлар хавфини ҳам оширмоқда.

Хусусан, ўрмон қопламининг камайиши сел ва кўчкилар хавфини ошириши, сув ҳавзаларининг ҳолати ёмонлашиши ҳамда инфратузилма ва қишлоқ хўжалиги ҳудудларига таҳдидни кучайтириши мумкин.

2035 йилгача 150 минг гектар ҳудуд тикланади

Қирғизистон ҳукумати 2035 йилгача деградацияга учраган ўрмон ҳудудлари, ёнбағирлар ва сув ҳавзаларининг камида 150 минг гектарини тиклаш ёки барқарорлаштиришни режалаштирмоқда.

Шунингдек, ўрмонларни тиклаш ва табиатни муҳофаза қилиш бўйича бошқа чора-тадбирлар орқали устувор сув ҳавзаларининг камида 60 фоизини қамраб олиш режалаштирилган.

Мазкур чоралар иқлим ўзгариши оқибатларини юмшатиш, табиий ресурсларни муҳофаза қилиш ва сел ҳамда кўчкилар хавфини камайтиришга қаратилган.