Қозоғистонда миллий валюта (Тенге) номи ўзгармоқда

Tengrinews нашрининг хабар беришича, Солиқ кодексидаги “тенге” сўзи “теңге”га алмаштирилади. Аниқроғи, кодекснинг расмий русча матнида миллий валюта номи қозоқча “ң” ҳарфи билан ёзилади.

Миллий банк ҳам шунга ўхшаш ишни бошлади: аввалроқ у ўз қарорларида “тенге” сўзини “теңге”га алмаштириш таклиф этилган лойиҳани муҳокамага қўйган.

Солиқ кодексида яна нималар ўзгаради:

• “иностранец” (чет эллик) сўзи расмийроқ бўлган “иностранный гражданин” (чет эл фуқароси) иборасига алмаштирилади;
• бир қатор нормалардаги “Парламент” сўзи “Қурултой”га ўзгартирилади;
• алоҳида моддаларда "Қозоғистон Республикаси Қурултойи" ва "Қозоғистон Халқ Кенгаши" иборалари пайдо бўлади;
• "республика референдуми" ибораси "умумхалқ референдуми"га алмаштирилади;
• ҳудудларни санаб ўтишда энди аввал пойтахт, сўнг вилоятлар ва республика аҳамиятидаги шаҳарлар кўрсатилади.

Ўзгартиришлар Солиқ кодексини янги конституциявий моделга мувофиқлаштириш билан боғлиқ.