Қозоғистон ва Европа Иттифоқи $12 миллиардлик келишувларга эришди

Қозоғистон президенти Қосим-Жомарт Тоқаев Европа Иттифоқи билан 12 миллиард долларлик тижорий келишувлар имзолади. Бу ҳақда Tengrinews нашри хабар берди.

Қосим-Жомарт Тоқаев 22 июнь куни расмий ташриф билан Брюсселга келган эди. Эртаси куни Европа кенгаши Президенти Антониу Кошта ва Европа комиссияси Президенти Урсула фон дер Ляен билан музокара ўтказди.

Давлат раҳбари янги келишувлар ҳақида “Қозоғистон–Европа Иттифоқи” давра суҳбати чоғида маълум қилди.

“Ўтган йили мамлакатимиз иқтисодиёти 6,5 фоизга ўсди, бу Халқаро валюта жамғармаси (ХВЖ) башорат қилган жаҳон иқтисодиёти ўсиш суръатидан икки баравар юқоридир. Ялпи ички маҳсулотимиз 305 миллиард доллардан ошди, аҳоли жон бошига ЯИМ эса 15 минг долларни ташкил қилди. ХВЖ прогнозларига кўра, жорий йилда мамлакат иқтисодиёти 360 миллиард долларга етади. Бугунги кунда кичик ва ўрта тадбиркорлик иқтисодиётимизнинг қарийб 40 фоизини ташкил этиб, асосий капиталга киритиладиган инвестицияларнинг деярли 70 фоизини таъминламоқда", — деди Тоқаев.

Президентнинг айтишича, Қозоғистонда янада шаффоф, рақобатбардош ва сармоядорлар учун жозибадор иқтисодиётни барпо этишга қаратилган кенг кўламли сиёсий ва иқтисодий модернизация жараёни кетмоқда.

Шунингдек, Тоқаев Қозоғистонда халқаро инвесторлар учун кенг кўламли солиқ ва миграция имтиёзларини тақдим этувчи “Олтин виза” дастури каби янги рағбатлантирувчи чоралар жорий этилаётганини таъкидлади.