Ленинградда форум олдидан дрон ҳужумлари авж олди

Муҳим энергия экспорти инфратузилмаси ва йирик нефтни қайта ишлаш заводи жойлашган Ленинград вилоятида чоршанбадан бошлаб Санкт-Петербург шаҳрида иқтисодий анжуман — Президент Владимир Путиннинг “Rossiya DAVOSi” форуми бўлиб ўтмоқда.

Россия 2022 йилда Украинага қўшин киритганидан бери бешинчи бор ўтказилаётган ушбу сармоявий форум, Россия назоратидаги Луганскка уюштирилган ва қурбонларга сабаб бўлган ҳужумга жавобан Киевга қилинган дрон ва ракета ҳужумидан бир неча соат ўтиб ўз ишини бошлади.

Чоршанбага ўтар кечаси Москва томон йўл олган 13 та дрон уриб туширилди, деди шаҳар мери Сергей Собянин.

Россиянинг авиация назорати идораси “Росавиатсия” мамлакатнинг иккинчи йирик ва Путиннинг она шаҳри бўлмиш Санкт-Петербургдаги Пулково аэропортида парвозлар вақтинча чекланганини маълум қилди.

Маҳаллий ахборот воситаларининг хабар беришича, 30 дан ортиқ авиарейс кечиктирилган ёки бекор қилинган.

Украина сўнгги пайтларда Москвани даромаддан маҳрум қилиш мақсадида Россиянинг энергетика инфратузилмасига ҳужумларни кучайтирган.

Сешанба куни у Россия жанубидаги Илский экспорт нефтни қайта ишлаш заводига дронлар ёрдамида зарба берди.

Ўзбекистон президенти Россияга боради

Шавкат Мирзиёев Владимир Путиннинг таклифига биноан 4-5 июнь кунлари амалий ташриф билан Санкт-Петербург шаҳрида бўлади.

Мирзиёев “Прагматик мулоқот – барқарор келажак сари йўл” шиори остида ўтадиган халқаро иқтисодий форумнинг ялпи йиғилишида иштирок этади ва нутқ сўзлайди.

Ташриф дастурида Россия Федерацияси Президенти билан учрашув ўтказиш ҳамда Ўзбекистонда биринчи интеграциялашган атом электр станцияси қурилишини бошлаш маросимида иштирок этиш режалаштирилган.