Украина ҳужумлари оқибатида Россияда 7 киши ҳалок бўлди, нефть базасида ёнғин келиб чиқди

18 июль куни Украина дронларининг Россия бир неча тўлқинли ҳужуми оқибатида 7 нафар омбор ходими ҳалок бўлган, яна ўнлаб одам жароҳатланган.

Шунингдек, ҳужумлардан бирида пойтахт яқинидаги нефть базасида ёнғин келиб чиққан.

Губернатор Евгений Первишовнинг сўзларига кўра, Москвадан тахминан 475 километр жануби-шарқда жойлашган Тамбов вилоятининг Котовск шаҳрида Россиянинг энг йирик онлайн-ритейлери “Wildberries”га қарашли омборга Украина дронлари келиб урилиши натижасида 25 киши тан жароҳати олган.

“Тунги сменада ишлаётган етти киши воқеа жойида ҳалок бўлди”, — деб ёзди Первишов Telegram'да ва яқинлашиб келаётган яна 28 та дрон уриб туширилганини қўшимча қилди.

“Агар улар мақсадига эришганида, тинч аҳоли орасидаги қурбонлар сони бундан анча кўп бўлиши мумкин эди”, — деди у.

Москва вилояти губернатори Андрей Воробёв бошқа бир ҳужумда Москванинг шарқидаги Электростал шаҳрида жойлашган “Wildberries”нинг яна бир омборига дрон ҳужуми оқибатида 24 киши жароҳатланганини маълум қилди.

Wildberries ҳаммуассиси ва бош директори Татяна Ким бу Россия ҳамда компания учун “даҳшатли тун” бўлганини айтиб, қурбонларнинг оила аъзоларига ҳамдардлик билдирди.

Воробёвнинг сўзларига кўра, Москва вилоятининг Ногинск шаҳрида ҳам учувчисиз учоқ қолдиқларининг қулаши нефть омборида ёнғин келтириб чиқарган.

У объектга етказилган зарар миқдорига аниқлик киритмади, бироқ Ногинскда икки киши жароҳат олгани ва яқин атрофдаги туғуруқхона эвакуация қилинганини маълум қилди.