Кечаси Украина Москва вилоятига 400 та дрон учирди

Москва мери Сергей Собяниннинг 20-июл куни хабар беришича, кечки соат 8:30 дан эрталабки 5:00 гача Москва вилоятига 400 дан ортиқ “душман дрони” учирилган.

Уларнинг аксарияти узоқ масофадаги ҳаво ҳужумидан мудофаа тизимлари томонидан зарарсизлантирилган, жумладан, 85 таси Россия пойтахтига яқинлашаётганда йўқ қилинган.

“Ҳаво ҳужумидан мудофаа кучлари ва радиоэлектрон тизимлар Москва вилоятига қилинган дрон ҳужумини қайтарди. Асосий зарарлар Подольск, Домодедово ва Одинцово туманларида қайд этилди”, — деб ёзди Москва вилояти губернатори Андрей Воробьёв Telegram мессенжерида.

Воробьёвнинг сўзларига кўра, икки киши жароҳатланган, бир нечта фуқаролик инфратузилма объектларида ёнғин чиққан.

Россиянинг энг йирик онлайн ритейлери бўлган “Wildberries” Подольск туманидаги логистика маркази эҳтиёт чораси сифатида эвакуация қилинганини, бироқ кейинроқ фаолиятини одатдаги тартибда давом эттирганини маълум қилди.

18-июл куни Украина дронларининг бир неча тўлқиндан иборат ҳужумлари оқибатида “Wildberries” омборининг етти нафар ходими ҳалок бўлиб, яна ўнлаб киши жароҳатланган.

Бошқа бир ҳужум эса Москва вилоятидаги нефть базасида ёнғин келтириб чиқарган.