Россия – Украина урушида йирик ҳужум: юзлаб дрон ва ракеталар учирилди

Энг кучли зарбалар Киев шаҳрига тўғри келган. Пойтахтнинг олтита тумани ҳужумга учраган. Тўққиз қаватли турар жой биносига берилган зарба оқибатида камида уч киши ҳалок бўлди, 40 нафардан ортиқ инсон, жумладан икки бола жароҳат олди.

Қутқарув хизматлари вайроналарни тозалаш ишларини давом эттирмоқда. Дастлабки маълумотларга кўра, бинолар остида яна одамлар бўлиши мумкин.

Ҳужумлар фақат Киев билан чекланмаган. Одесса вилоятидаги портлар ва темир йўл инфратузилмаси объектлари ҳам нишонга олинган.

Зеленский халқаро ҳамжамиятни воқеаларга бефарқ бўлмасликка чақириб, Украина ҳаво мудофааси тизимларини кучайтириш зарурлигини таъкидлади.

Ҳужум АҚШ воситачилигида муҳокама қилинган уч кунлик сулҳ якунланиши ортидан содир бўлди. Айни пайтда тинчлик музокаралари мураккаб босқичга кирган. Москва Украина қўшинларини Донбассдан олиб чиқишни талаб қилмоқда, Киев эса бу талабни таслим бўлиш, деб атамоқда.