“Шиппаклар мамлакати” – исроиллик вазир Италияни ҳақорат қилди

Италия оммавий ахборот воситаларининг хабар беришича, Бен Гвир ҳарбий жиноят ва қийноқ қўллашда гумонланиб, тергов қилинмоқда. Бунга фаолларнинг ўтган ой ҳибсга олиниш чоғида Исроил расмийлари томонидан ёмон муносабатда бўлингани сабаб қилиб кўрсатилган.

“Этиклар мамлакати шиппаклар мамлакатига айланиб қолибди”, – деб ёзди Бен Гвир X ижтимоий тармоғида Италия айбловларига жавобан. Бу Италиянинг географик шаклига нисбатан камситувчи ишора эди.

Италия ташқи ишлар вазири ва бош вазир ўринбосари Антонио Тажани бу сўзлар қабул қилиб бўлмас даражадалигини, вазирга ярашмаслигини ҳамда инсоннинг сиёсий ва маънавий савиясини кўрсатишини таъкидлади.

“Унинг прокуратура томонидан терговга тортилганини билгач, Италия ҳақида айтган сўзларини изоҳлашга тилим ожиз”, — деди Тажани.

Исроил 18 май куни Фаластин ҳудуди блокадасини ёриб ўтишга уринган 430 дан ортиқ халқаро фаолни ҳибсга олганди.

Бен Гвир қўллари боғланган флотилия фаолларини масхара қилаётгани акс этган видеони эълон қилгач, кенг кўламли норозиликларга сабаб бўлди.

Тажанининг таъкидлашича, Рим Европа Иттифоқини Бен-Гвирга қарши санкция қўллашга ундайди ва кўплаб мамлакатлар буни маъқулламоқда.

Аввалроқ Ирландия икки Исроил вазири – Бен-Гивир ва Безалел Смотричга нисбатан санкция қўллаганини хабар қилгандик.