Исроилнинг 2 нафар вазирига Ирландияга кириш тақиқланди

Жума куни Ирландия Исроил Миллий хавфсизлик вазири Итамар Бен Гвир ва Молия вазири Безалел Смотричнинг мамлакатга киришини тақиқлаганини эълон қилди ҳамда уларнинг фаластинлик фаолларга нисбатан муносабатини қоралади.

Ўта ўнгчи вазир Бен Гвир ўтган ой Ғазога йўл олган гуманитар ёрдам кемаларида Исроил аскарлари томонидан қўлга олинган фаолларни масхара қилганди. Ўшанда Ирландия Бош вазири Майкл Мартин Ғазодаги можарони кучайтиришда айбланадиган Исроил расмийларига нисбатан мамлакатга киришини чеклаш чораси кўрилишини айтганди.

Бен Гвир 2022 йилда Безалел Смотричнинг ўта ўнгчи “Диний Сионизм” партияси билан тузган иттифоқи қонунчилик сайловларида учинчи ўринни эгаллаганидан сўнг вазир бўлди.

Бен Гвир ва Смотрич биргаликда Исроил Бош вазири Бинямин Нетаняҳу ўнг қанот коалицион ҳукуматининг асосий таянчлари ҳисобланади.

“Икки вазирнинг нафақат кемалар билан боғлиқ воқеаси, балки доимий баёнотлари ва хатти-ҳаракатлари ҳам моҳиятан фаластинликларнинг Фаластиндан йўқ қилиш истагини англатади”, — деди Мартин жума куни Черногориядаги саммит чоғида журналистларга.

Унинг фикрича, бу хатти-ҳаракатлар Европа Иттифоқи даражасида ҳам санкциялар қўлланилишига асос бўла олади.

Ўтган ойда Франция ҳам Бен Гвирнинг мамлакатга киришини тақиқлаганди. 2025 йилнинг июнь ойида Буюк Британия бу икки шахсга мамлакатга киришни ман этган, кейинроқ Испания ва Словения каби бошқа давлатлар ҳам шу амални бажарган.

Ирландия ҲАМАСнинг 2023 йил октябрь ойида Исроилга уюштирган қонли ҳужумидан сўнг Исроилнинг Ғазони бомбардимон қилишини кескин танқид қилган давлатлардан биридир. Мамалакат 2024 йилда Фаластин давлатини тан олди.

Кўп ўтмай, Исроил ташқи ишлар вазири Гидеон Саар Ирландияни “Исроилга қарши кескин сиёсат юритишда” айблаб, мамлакатнинг Дублиндаги элчихонасини ёпишга буйруқ берганди.