“Shippaklar mamlakati” – isroillik vazir Italiyani haqorat qildi

Italiya ommaviy axborot vositalarining xabar berishicha, Ben Gvir harbiy jinoyat va qiynoq qo‘llashda gumonlanib, tergov qilinmoqda. Bunga faollarning o‘tgan oy hibsga olinish chog‘ida Isroil rasmiylari tomonidan yomon munosabatda bo‘lingani sabab qilib ko‘rsatilgan.

“Etiklar mamlakati shippaklar mamlakatiga aylanib qolibdi”, – deb yozdi Ben Gvir X ijtimoiy tarmog‘ida Italiya ayblovlariga javoban. Bu Italiyaning geografik shakliga nisbatan kamsituvchi ishora edi.

Italiya tashqi ishlar vaziri va bosh vazir o‘rinbosari Antonio Tajani bu so‘zlar qabul qilib bo‘lmas darajadaligini, vazirga yarashmasligini hamda insonning siyosiy va ma’naviy saviyasini ko‘rsatishini ta’kidladi.

“Uning prokuratura tomonidan tergovga tortilganini bilgach, Italiya haqida aytgan so‘zlarini izohlashga tilim ojiz”, — dedi Tajani.

Isroil 18-may kuni Falastin hududi blokadasini yorib o‘tishga uringan 430 dan ortiq xalqaro faolni hibsga olgandi.

Ben Gvir qo‘llari bog‘langan flotiliya faollarini masxara qilayotgani aks etgan videoni e’lon qilgach, keng ko‘lamli noroziliklarga sabab bo‘ldi.

Tajanining ta’kidlashicha, Rim Yevropa Ittifoqini Ben-Gvirga qarshi sanksiya qo‘llashga undaydi va ko‘plab mamlakatlar buni ma’qullamoqda.

Avvalroq Irlandiya ikki Isroil vaziri – Ben-Givir va Bezalel Smotrichga nisbatan sanksiya qo‘llaganini xabar qilgandik.