Сунъий интеллект АҚШ ва Хитойнинг асосий рақобат майдонига айланди

Хитой раҳбари Си Сзинпиннинг АҚШга режалаштирилган ташрифи арафасида Вашингтон ва Пекин сунъий интеллект масаласида янги музокараларни олиб бормоқда.

Томонлар СИ хавфсизлиги бўйича алоҳида мулоқотни кенгроқ иқтисодий музокаралар билан интеграциялаш имкониятини ҳам кўриб чиқмоқда. Май ойида икки давлат раҳбарлари СИ бўйича ҳукуматлараро мулоқотни йўлга қўйишга келишиб олганди.

South China Morning Post нашрининг ёзишича, Пекин АҚШ томонидан ўртага ташланган СИ хавфсизлиги талаблари сунъий интеллектнинг салбий оқибатларини камайтириши билан бирга Хитойнинг СИ технологиясини ривожлантиришига ҳам тўсқинлик қилишидан хавотирда. Шу сабаб хавфсизлик масаласи технологик рақобатга ҳам боғланиб қолмоқда.

Рақобат чиплар билангина чекланмаган

Авваллари АҚШ ва Хитой ўртасидаги технологик қарама-қаршилик асосан яримўтказгичлар ва уларнинг экспорти атрофида кечарди. Эндиликда сунъий интеллект марказий йўналишлардан бирига айланмоқда.

СИ моделлари, уларни ўқитишда фойдаланиладиган манбалар, хавфсизлик стандартлари ва илғор технологиялардан фойдаланиш имконияти икки давлат ўртасидаги музокараларнинг муҳим мавзусига айланиб улгурди.

АҚШ илғор СИ технологияларининг хавфсизлиги ва улардан ҳарбий ёки киберҳужумларда фойдаланмаслик кафолати йўқлигидан хавотирда.

Вашингтон яқинда Хитойнинг айрим СИ компанияларини АҚШда яратилган моделлар хусусиятларини ноқонуний равишда кўчиришда айблаган. Пекин эса бу айбловларни рад этиб, АҚШ Хитойнинг технологик ривожланишини чеклашга уринаётганини билдирган.

СИ хавфсизлиги – глобал масала

Пекин ҳам СИ билан боғлиқ хатарлар тўғрисида тез-тез хавотирли баёнотлар беради. Хитой расмийлари сунъий интеллект технологияси учун халқаро хавфсизлик ва бошқарув механизмларини татбиқ этишга чақирган.

АҚШ президенти Дональд Трамп эса СИ ривожланишини ортиқча тартибга солиш АҚШнинг Хитой устидан технологик устунлигини заифлаштиради, деган позицияда. Трамп АҚШнинг СИ соҳасидаги пешқадамлигини сақлаб қолишни устувор вазифа сифатида илгари сурмоқда.

Шу сабабли Си Сзинпин ва Дональд Трамп ўртасидаги режалаштирилган учрашувда СИ масаласи оддий технологик мавзудан кўра кенгроқ геосиёсий аҳамият ҳам касб этиши шубҳасиз.

Томонлар бир вақтнинг ўзида СИ хавфсизлиги бўйича ҳамкорлик қилиш ва технологик устунлик пойгасини давом эттириш муаммосига дуч келмоқда.