Хитой технологик кадрларини АҚШдан ортга қайтармоқда

The Wall Street Journal ёзишича, Хитойнинг йирик технологик компаниялари Google, Meta, OpenAI ва Amazon каби корпорацияларда ишлаган мутахассисларга юқори маош ва катта имкониятлар таклиф қилмоқда. Айрим таклифлар Silicon Valley даражасидан ҳам юқори.

Мутахассисларнинг айтишича, Хитойда яшаш харажатлари АҚШга нисбатан арзонроқ. Шу сабаб Пекин, Шанхай ва Шэньчжэн каби шаҳарлардаги таклифлар кўпчилик учун жозибадор кўринмоқда.

Хитой технология соҳасидаги ўз имкониятларини ҳам кенгайтирмоқда. Масалан, Google’нинг Gemini лойиҳасида ишлаган Ву Ёнхи ҳозир ByteDance компаниясининг AI тадқиқотларига раҳбарлик қилмоқда. Собиқ OpenAI тадқиқотчиси Яо Шунью эса Tencent’нинг бош AI олимига айланган.

Мутахассисларнинг қайтишига H-1B визалари билан боғлиқ ноаниқликлар ҳам таъсир қилмоқда. АҚШда миграция сиёсати атрофидаги баҳслар ва эҳтимолий чекловлар айрим хорижлик кадрларни хавотирга солган.

Хитой ҳукумати эса бу жараённи фаол қўллаб-қувватлаяпти. Қайтаётган мутахассисларга солиқ имтиёзлари, субсидиялар, арзон офислар ва startup дастурлари таклиф қилинмоқда.

2024 йилда хориждан Хитойга қайтган талабалар сони 535 минг нафардан ошган. LinkedIn сўровига кўра, хорижда таҳсил олаётган хитойлик PhD талабаларининг 59 фоизи ўқишдан кейин ватанга қайтишни режалаштирган.

Бу жараён АҚШ ва Хитой ўртасидаги рақобат энди фақат технология эмас, балки талантлар учун ҳам кечаётганини кўрсатмоқда.