Сурия президенти БМТ минбаридан Туркия ва бошқа мамлакатларга миннатдорлик билдирди

Аш-Шара таъкидлаганидек, у БМТ Бош Ассамблеясида қарийб 58 йилдан кейин нутқ сўзлаган илк суриялик етакчи ҳисобланади.

Асосий нуқталар

Исроил таҳдидлари ҳақида: президентнинг сўзларига кўра, 8 декабрдан бери Исроилдан келаётган таҳдидлар тўхтамаган ва бу минтақага янги, хатарли тўқнашувлар олиб келиши мумкин. Сурия халқаро ҳамжамиятни ўз ҳудудий яхлитлигини ҳимоя қилишда қўллаб-қувватлашга чақирди.

Ғазо халқини қўллаб-қувватлаш: Аш-Шара Ғазо аҳолиси — болалар, аёллар ва зулмга дуч келаётган барча миллатларни ҳимоя қилиш кераклигини таъкидлаб, “Уруш тўхтатилиши шарт” деди.

Санкцияларга муносабат: президентнинг таъкидлашича, фаол дипломатия туфайли Сурия кўплаб халқаро муносабатларни тиклади ва аксарият санкциялар бекор қилинди. Шу билан бирга, у қолган санкцияларни ҳам тўлиқ бекор қилишга чақирди.

Эски режимнинг жиноятлари: Аш-Шаранинг таъкидлашича, ағдарилган режим 1 миллионга яқин одамни ўлдирган, юз минглаб инсонларни қамоқларда қийноққа солган, 14 миллион одамни уйидан чиқариб юборган ва мамлакатга хорижий кучлар ҳамда қўшинларни олиб кирган. Ундан ташқари, 200 дан ортиқ кимёвий ҳужум амалга оширилгани қайд этилди.

Қочқинларни қайтариш ва ислоҳотлар: президент суриялик қочқинлар учун ватанига қайтиш йўллари очилганини билдирди. Шунингдек, наркобизнесга қарши кураш кучайтирилганини ва Сурия энди “муаммо экспорт қилувчи” мамлакат эмаслигини таъкидлади.

Аш-Шара нутқини шундай хулоса билан якунлади:

“Сурия ва бутун минтақа учун бу — барқарорлик, тинчлик ва тараққиётга эришиш учун тарихий имкониятдир”.