Судан ва Жанубий Суданда дрон ҳужуми: 153 киши ҳалок бўлди

Судан ва Жанубий Судан ўртасидаги баҳсли Abyei минтақасида жойлашган Амиет бозори яқинида дрон ҳужуми оқибатида камида 153 киши ҳалок бўлди. Зарба яқиндаги ёқилғи омборига теккан ва кучли ёнғинга сабаб бўлган. Бу ҳақда Associated Press (AP) агентлиги хабар берди.

Abyei маъмуриятининг вақтинчалик ахборот вазири Йоханна Акол Нгорнинг маълум қилишича, ҳужум душанба куни, 19 октябрда, Abyei шаҳрининг шимолидаги Амиет бозорида содир бўлган. Унинг сўзларига кўра, ёнғин давом этгани сабабли қурбонлар сони яна ортиши мумкин.

Судан ҳарбий қўмондонлигининг юқори мартабали вакили армия дрон орқали зарба берганини тасдиқлаган. Унинг айтишича, нишон Жанубий Судандан келаётган ва «Тезкор қўллаб-қувватлаш кучлари»га (RSF) етказилиши тахмин қилинган ёқилғи ташувчи машиналар бўлган. Ҳарбий вакил ҳалок бўлганлар RSF аъзолари ва ёқилғи контрабандасига алоқадор шахслар эканини билдирган.

Бироқ AP агентлиги нишонлар ва ҳалок бўлган шахсларнинг кимлиги ҳақидаги бу маълумотларни мустақил равишда тасдиқлай олмаган.

БМТ Бош котиби Амиет бозори ва Тодач яқинидаги дрон ҳужумларини қоралади. Ташкилот баёнотида аёллар ва болаларни ҳам ўз ичига олган ўнлаб тинч аҳоли вакиллари ҳалок бўлгани, кўплаб одамлар жароҳатлангани айтилди. Ҳужумларни ким амалга оширгани БМТ баёнотида кўрсатилмаган.

БМТ маълумотига кўра, кўплаб одамлар бедарак йўқолган ва қурбонлар сони ортиши мумкин. Abyeiдаги БМТ муваққат хавфсизлик кучлари (UNISFA) жабрланганларга шошилинч тиббий ёрдам кўрсатиш, уларни эвакуация қилиш ва ёнғин тарқалишининг олдини олиш учун тиббиёт ходимлари ҳамда махсус гуруҳларни сафарбар қилган.

«Чегара билмас шифокорлар» халқаро ташкилоти (MSF) маълум қилишича, яқиндаги Амэт Бек шифохонасига 20 нафардан ортиқ жароҳатланган киши олиб келинган. Улар орасида аҳволи оғир беморлар ва куйиш жароҳати олганлар ҳам бор.

Жанубий Судан Ташқи ишлар вазирлиги ҳам ҳужум учун Судан армиясини айблади. Вазирлик Судан элчисини чақиртириб, норозилик билдирган ва тинч аҳоли ҳаёти ҳамда мол-мулкига хавф туғдирувчи ҳаракатларни тўхтатишга чақирган.

Суданда ҳукумат армияси ва RSF ўртасидаги қуролли тўқнашувлар 2023 йил апрель ойидан бери давом этмоқда. Уруш мамлакатнинг катта қисмида вайронагарчиликларга сабаб бўлиб, қўшни ҳудудлар хавфсизлигига ҳам таҳдид солмоқда.

Муаллиф: Ҳасанбой ОЧУН