Покистоннинг ҳаво ҳужумлари оқибатида Афғонистонда 9 киши ҳалок бўлди – Кобул

1 октябрь куни тунда Покистон Афғонистоннинг икки вилоятига ҳаво зарбалари берди. Буни ҳар икки давлат тасдиқлади. Афғонистоннинг билдиришича, бомбардимон оқибатида аёллар ва болалардан иборат жами 9 киши ҳалок бўлган, 11 киши яраланган.

Покистон эса зарбалар икки ҳудуддаги жангарилар яширинган жойларга берилганини маълум қилди. Дастлабки маълумотларга кўра, 22 нафар жангарӣ ўлдирилган.

Томонлар берган қурбонлар ҳақидаги маълумотлар ҳозирча тўлиқ тасдиғини топмаган.

Икки давлат ўртасидаги вазият жорий йил бошида кескинлашганидан бери Покистон Афғонистон ҳудудига бир неча бор ҳаво зарбалари берган. Чегара яқинидаги жангарилар фаолияти туфайли Исломобод ва Кобул ўртасида узоқ йиллик келишмовчилик мавжуд.

БМТ маълумотларига кўра, жорий йил бошидан бери чегарадаги ҳужумлар оқибатида Афғонистонда 1 100 дан ортиқ тинч аҳоли ҳалок бўлган ёки яраланган.

Покистон тинч аҳолини нишонга олганини рад этиб, мамлакат ичидан туриб зарба берадиган жангариларга қарши курашаётганини таъкидламоқда. Афғонистон эса ўз ҳудудида жангариларни яшираётганини инкор этиб келади.