Тақиқ қўйилган Рубио: у Хитойга қандай кирди?

Расмий ҳужжатларда унинг исми “Марко Лу” тарзида ёзилди.

Алан Фишер (“Ал-Жазира”) хабар беришича, Хитой ҳукумати фамилиянинг биринчи бўғинини бошқа иероглиф билан алмаштириб, Рубионинг ташрифини расмийлаштирди. Бу усул Пекинга санкцияларни бекор қилмасдан, уни қабул қилиш имконини берди.

Хитой ҳукумати ва расмий ОАВ Рубионинг фамилиясини 2025 йил январда давлат котиби лавозимига киришиши арафасида бошқача транслитерация қилишни бошлади. 2025 йил март ойида Хитой ТИВ расмий вакили Лин Цзянь “санкциялар Рубионинг сенаторлик давридаги Хитойга қарши чиқишлари билан боғлиқ” эканини таъкидлади.

Нега Рубио Хитой санкцияларига учраган?

Марко Рубио Флорида штати сенатори бўлган даврда, 2019 йилдан то Трамп маъмуриятига тайинлангунига қадар Хитой унга қарши санкциялар жорий этди.
2020 йилда Пекин икки марта Рубиога санкция қўллади. Сабаб – унинг Гонконгдаги репрессив чораларга қарши чиқиши. Гонконг – собиқ Британия мустамлакаси бўлиб, Хитойдан кенгроқ автономия талаб қилган.

Рубио куба-америкалик сиёсатчи ва коммунизмнинг ашаддий танқидчиси сифатида, Хитойнинг асосан мусулмон уйғур озчиликка нисбатан таъқиб ва босимларини ҳам қаттиқ танқид қилди. У Синзян – Хитойнинг шимолий ғарбидаги автоном ҳудуддаги мажбурий меҳнат лагерларига қарши чиқди.

Сенаторлик даврида Рубио 2021 йилда АҚШ Конгресси қабул қилган “Уйғурларни мажбурий меҳнатдан ҳимоя қилиш тўғрисидаги қонун”ни фаол қўллаб-қувватлади. Бу қонунга кўра, компаниялар Синзяндан импорт қилинаётган маҳсулотлар мажбурий меҳнат орқали ишлаб чиқарилмаганини исботлаши шарт эди.

Муаллиф: Азиз Солиев