Хитой ЕИнинг 14 та компаниясига экспорт чекловларини жорий қилди

 Бу ҳақда 24 июль куни Хитой Савдо вазирлиги маълум қилди.

Вазирликка кўра, мазкур қарор миллий хавфсизликни таъминлаш, миллий манфаатларни ҳимоя қилиш ҳамда оммавий қирғин қуролларини тарқатмаслик соҳасидаги халқаро мажбуриятларни бажариш мақсадида қабул қилинган.

Қарорга мувофиқ, экспорт қилувчиларга Lafert S.p.A., Garnet S.r.l., Sindlhauser Materials GmbH, Rheinmetall AG, Antraco Chemie-Handelsgesellschaft mbH, InPACT S.A. ва III-V LAB каби компанияларга икки мақсадли маҳсулотларни экспорт қилиш тақиқланади.

Шунингдек, хорижий ташкилотлар ва жисмоний шахсларга ҳам Хитойда ишлаб чиқарилган икки мақсадли маҳсулотларни мазкур компанияларга етказиб бериш ёки уларга ўтказиш тақиқланди. Вазирлик бундай операциялар дарҳол тўхтатилиши лозимлигини билдирди.

Пекиннинг маълум қилишича, қарор Хитойнинг «Экспорт назорати тўғрисида»ги қонуни ҳамда икки мақсадли маҳсулотлар экспорт назоратига оид низомлар асосида қабул қилинган.

Маълумот учун, икки мақсадли маҳсулотлар — фуқаролик соҳасида ҳам, ҳарбий мақсадларда ҳам қўлланилиши мумкин бўлган товарлар, технологиялар ва хизматлар ҳисобланади.