Украина «Маша ва айиқ» мультсериалига санкция жорий этди

Расмий хабарда айтилишича, болалар контенти ниқобига яширинган ушбу мультсериал Украинанинг миллий хавфсизлигига таҳдид солиб, россияпарастлик мафкурасини тарқатади.

Санкциялар рўйхатига мультсериал муаллифи бўлган «Анимаккорд» студияси, унинг асосчиси, бош директори, шунингдек, мультфильм сценаристи, режиссёри, продюсери, сериал ҳаммуаллифи ҳамда ҳуқуқий эгаси киритилди.

Сериал ҳаммуаллифлари эса тажовузкор давлат бюджетига маблағ тўлаб келиши таъкидланди.

«Россия тарғиботига, айниқса, болаларга қаратилган ва йирик халқаро платформалар орқали тарқатилаётган бўлса, унга алоҳида муносабат билдиришимиз керак», – деди президент маслаҳатчиси Владислав Власюк.

Хабарда Украина санкцияларни халқаро юрисдикцияларда мувофиқлаштириш учун барча далилларни тақдим этиши айтилган.

Яна кимларга санкция?

Украина Президенти Влодимир Зеленский имзолаган тўртта фармонда Россия ҳарбий-саноат комплекси корхоналари, «Русал» гуруҳи таркибига кирувчи компаниялар, Россиянинг юқори мартабали амалдорлари санаб ўтилган.

Қарорларга кўра, 28 нафар Россия фуқароси, 36 та Россия ва битта Хитой компаниясига нисбатан санкциялар жорий этилди.