Россия янги сафарбарлик бошлаган – Зеленский

Россиянинг 28 сентябрь кунги Украина пойтахтига уюштирган дрон зарбалари оқибатида Киев марказидаги Фанлар академияси зарар кўриб, камида 2 киши ҳалок бўлди.

Володимир Зеленский мамлакат бўйлаб Россиянинг амалга оширган дрон ҳужумлари натижасида умумий тўққизта одам ўлгани, 80 дан ортиқ киши жароҳатланганини билдирди.

Сўнгги ҳафталарда Россия Киев ва бошқа шаҳарларга тезроқ учадиган, баланд парвоз қилувчи реактив двигателли дронлар билан ҳужум қила бошлади.

Зеленский кечки видеомурожаатида мазкур дронларга қарши курашиш ҳамон қийинчиликлар туғдираётганини айтди. Унинг сўзларига кўра, Украинага учирилган 120 та дроннинг 90 таси парракли эмас, балки реактив двигател билан жиҳозланиб, уларнинг 57 фоизи уриб туширилган.

Расмийлар Киевдаги турли нишонларга, жумладан, фармацевтика компанияси, ёқилғи қуйиш шохобчалари ва тиббиёт муассасасига ҳам ҳужумлар уюштирилганини маълум қилди. Бошқа шаҳар ва ҳудудларда эса фуқаролик объектлари, корхоналар ҳамда алоқа инфратузилмаси нишонга олинган.

Ўз ўрнида Украина ҳам Россиянинг урушни молиялаштириш имкониятлари ва даромадларини камайтириш мақсадида нефтьни қайта ишлаш заводлари, онлайн савдо компанияларига зарбалар бермоқда.

“Россия янги сафарбарликни бошлади”

Зеленский Украина Бош разведка бошқармаси ҳисоботини ҳам келтириб, Россия армия учун янги сафарбарлик бошлаганини кўрсатувчи маълумотлар мавжудлигини айтди.

“Улар турли усуллар билан армияга жалб қилинаётган одамлар сонини оширмоқда. Россия армиясига қайси давлатдан одамларни ёллаётган бўлса, ўша давлат ҳукумати бунга қарши туриши лозим. Биз барча тегишли ҳукуматларни хабардор қиламиз”, – деди Украина президенти.

Зеленскийнинг сўзларига қараганда, 2024 йилда Россияга олиб келинган 8 минг нафар Шимолий Корея аскари ҳануз мамлакатда, яна 10 минг нафари эса тайёргарлик жараёнида.

Россия президенти Владимир Путин эса Москва янги сафарбарлик эълон қилаётгани ҳақидаги ҳар қандай фикрни “мутлақо бемаънилик” деб атаган.

Россия армиясидаги марказий осиёликлар

“Украина – Марказий Осиё суриштируви” доирасида “I Want to Live” лойиҳаси Россия Мудофаа вазирлиги билан шартнома имзолаб, Россия армиясида хизмат қилган ёки ҳозирда хизмат қилаётган марказий осиёлик 13 мингга яқин фуқарони аниқлаган.

Энг катта улуш Ўзбекистон ҳиссасига тўғри келиб, 4 853 нафар фуқаро қайд этилган.