Кремлга алоқадор махфий ахборот операцияларида Ўзбекистон номи ҳам бор

OCCRP ва Delfi Estonia журналистлари Россия Президенти Администрацияси билан боғлиқ махфий ҳужжатларни фош қилди. Ҳужжатларда Ўзбекистон номи ҳам қайд этилгани катта муҳокамаларга сабаб бўлмоқда.

Сиёсат

24.05.2026, 21:22

Улашиш:

Кремлга алоқадор махфий ахборот операцияларида Ўзбекистон номи ҳам бор

Текширув материалларига кўра, АҚШ, Буюк Британия ва Европа Иттифоқи санкцияларига тушган Россиянинг Social Design Agency (СДА) номли PR компанияси турли давлатларда “когнитив зарбалар” деб аталган ахборот ва таъсир операцияларини амалга ошириб келган.

Журналистлар қўлга киритган ички тақдимотларда “СНГ-МЕДИА” деб номланган медиа тармоғи ҳақида ҳам маълумотлар келтирилган. Ҳужжат муаллифлари мазкур лойиҳанинг асосий мақсадини “СССР парчаланганидан кейин узилган алоқаларни тиклаш” дея изоҳлаган.

Ўзбекистон ҳам рўйхатда бор

Ҳужжатларда қайд этилишича, тармоқ фаолияти Арманистон, Қозоғистон, Ўзбекистон, Тожикистон, Туркманистон, Қирғизистон ҳамда Каспий минтақасига қаратилган.

Эътиборлиси, “СНГ-МЕДИА” таркибида Ўзбекистонга йўналтирилган “Toshkent Today” нашри фаолият юритиши очиқланган.

Тақдимотларда ушбу платформа Ўзбекистондаги воқеаларни ёритувчи медиа ресурс сифатида тасвирланган. Шу билан бирга, бутун тармоқнинг вазифаси постсовет ҳудудида ягона ахборот майдонини сақлаб қолиш ва аудитория билан ишлаш экани таъкидланган.

Нашр ортида ким турибди?

Таҳлилларга кўра, “Toshkent Today” 2022 йилда иш бошлаган. Нашр 2021 йилда Роскомнадзор томонидан ОАВ сифатида рўйхатдан ўтказилган бўлиб, унинг муассиси сифатида “СНГ-МЕДИА” кўрсатилган.

Мутахассислар фикрича, минтақада фаолият юритаётган айрим русийзабон медиа платформаларнинг ҳақиқий мақсади ва улар ортида турган тузилмалар доимо ҳам очиқ бўлавермайди.

Арманистон мисоли ҳам келтирилган

Мақолада Арманистонга оид мисол ҳам келтирилади. Унга кўра, “СНГ-МЕДИА” таркибидаги erevan.one платформаси Россиядаги арман диаспорасига йўналтирилган бўлиб, унинг асосий вазифаларидан бири амалдаги ҳукумат ва бош вазир Никол Пашинянга нисбатан салбий муносабат шакллантириш бўлган.

Шунингдек, платформа Россияга яқин сиёсий кучларни қўллаб-қувватлаш мақсадида ишлагани ҳам қайд этилган.

Ахборот майдони — геосиёсий қуролми?

Сизиб чиққан ҳужжатлар ахборот майдони бугунги кунда геосиёсий таъсир воситасига айланаётганини яна бир бор кўрсатмоқда.

Ҳозирча Ўзбекистон ушбу ҳужжатларда алоҳида операция объекти сифатида тилга олинмаган. Бироқ мамлакат “СНГ-МЕДИА” лойиҳаси фаолият юритадиган ҳудудлар рўйхатида қайд этилгани экспертлар эътиборини тортмоқда.