Вашингтон штатининг Сиэтл шаҳрида “Ўзбек маҳалласи” ташкил этилди

АҚШнинг Сиэтл шаҳрида ўзбеклар бирлашиб, илк бор “Ўзбек маҳалласи” жамоат бирлашмасини ташкил этди.

Жамоа Вашингтон штати томонидан расман рўйхатдан ўтказилди. Штат Давлат котиби Стив Хоббс томонидан ҳудуддаги илк ўзбек жамоаси сифатида қайд этилди.

Бугунги кунда Вашингтон штатида 3 мингдан ортиқ Ўзбекистон фуқаролари ва келиб чиқиши ўзбекистонлик бўлган ватандошлар истиқомат қилади.

Уларнинг аксарияти Сиэтл ҳамда унинг атрофидаги йирик технологик ва саноат компанияларида фаолият юритмоқда. Хусусан, Microsoft, Amazon, Google, Boeing, Oracle, NVIDIA каби дунёга машҳур компанияларда ишлаётган ўзбекистонликлар дастурий таъминот, сунъий интеллект, муҳандислик, авиация, таълим, тиббиёт ва тадбиркорлик йўналишларида иш ўринларига эга.

“Ўзбек маҳалласи”нинг мақсадлари

“Ўзбек маҳалласи”га асли хоразмлик Мусо Холмуродов раис этиб сайланди. У Сиэтлда Маркс номи билан танилган бўлиб, Вашингтон штати ҳукумат тизимида 15 йилдан ортиқ тажрибага эга. Айни пайтда штат Тузатиш ишлари департаментида раҳбарлик лавозимида фаолият юритмоқда.

Жамоа миллий байрам ва маданий тадбирларни ташкил этиш, янги келган юртдошларнинг мослашувига кўмаклашиш, ёшлар ва мутахассислар ўртасида ҳамкорликни ривожлантириш, хайрия ҳамда таълим лойиҳаларини қўллаб-қувватлашни режалаштирмоқда.

Келгусида “Ўзбек маҳалласи” Сиэтлдаги ўзбекистонликларнинг ишончли таянчи ва ягона жамоавий платформасига айланиши кутилмоқда.

Вашингтон штати ва Сиэтлнинг иқтисодий-технологик салоҳияти

Вашингтон штати АҚШнинг иқтисодий ва инновацион жиҳатдан энг ривожланган ҳудудларидан бири ҳисобланади. Унинг 2025 йилдаги ялпи ички маҳсулоти қарийб 900 миллиард АҚШ долларини ташкил этган.

Штат юқори технологиялар, авиация-космик саноати, сунъий интеллект, биотехнология, яшил энергетика, халқаро савдо ва логистика йўналишларидаги салоҳияти билан ажралиб туради.

Сиэтл эса Microsoft, Amazon, Boeing, Google, Oracle ва NVIDIA каби йирик компаниялар жойлашган АҚШнинг етакчи технологик марказларидан биридир.