Vashington shtatining Sietl shahrida “O‘zbek mahallasi” tashkil etildi

AQSHning Sietl shahrida o‘zbeklar birlashib, ilk bor “O‘zbek mahallasi” jamoat birlashmasini tashkil etdi.

Jamoa Vashington shtati tomonidan rasman ro‘yxatdan o‘tkazildi. Shtat Davlat kotibi Stiv Xobbs tomonidan hududdagi ilk o‘zbek jamoasi sifatida qayd etildi.

Bugungi kunda Vashington shtatida 3 mingdan ortiq O‘zbekiston fuqarolari va kelib chiqishi o‘zbekistonlik bo‘lgan vatandoshlar istiqomat qiladi.

Ularning aksariyati Sietl hamda uning atrofidagi yirik texnologik va sanoat kompaniyalarida faoliyat yuritmoqda. Xususan, Microsoft, Amazon, Google, Boeing, Oracle, NVIDIA kabi dunyoga mashhur kompaniyalarda ishlayotgan o‘zbekistonliklar dasturiy ta’minot, sun’iy intellekt, muhandislik, aviatsiya, ta’lim, tibbiyot va tadbirkorlik yo‘nalishlarida ish o‘rinlariga ega.

“O‘zbek mahallasi”ning maqsadlari

“O‘zbek mahallasi”ga asli xorazmlik Muso Xolmurodov rais etib saylandi. U Sietlda Marks nomi bilan tanilgan bo‘lib, Vashington shtati hukumat tizimida 15 yildan ortiq tajribaga ega. Ayni paytda shtat Tuzatish ishlari departamentida rahbarlik lavozimida faoliyat yuritmoqda.

Jamoa milliy bayram va madaniy tadbirlarni tashkil etish, yangi kelgan yurtdoshlarning moslashuviga ko‘maklashish, yoshlar va mutaxassislar o‘rtasida hamkorlikni rivojlantirish, xayriya hamda ta’lim loyihalarini qo‘llab-quvvatlashni rejalashtirmoqda.

Kelgusida “O‘zbek mahallasi” Sietldagi o‘zbekistonliklarning ishonchli tayanchi va yagona jamoaviy platformasiga aylanishi kutilmoqda.

Vashington shtati va Sietlning iqtisodiy-texnologik salohiyati

Vashington shtati AQSHning iqtisodiy va innovatsion jihatdan eng rivojlangan hududlaridan biri hisoblanadi. Uning 2025-yildagi yalpi ichki mahsuloti qariyb 900 milliard AQSH dollarini tashkil etgan.

Shtat yuqori texnologiyalar, aviatsiya-kosmik sanoati, sun’iy intellekt, biotexnologiya, yashil energetika, xalqaro savdo va logistika yo‘nalishlaridagi salohiyati bilan ajralib turadi.

Sietl esa Microsoft, Amazon, Boeing, Google, Oracle va NVIDIA kabi yirik kompaniyalar joylashgan AQSHning yetakchi texnologik markazlaridan biridir.