Индонезияда 7,7 магнитудали зилзила: камида 20 киши ҳалок бўлди

Индонезия Геофизика агентлиги — BMKG маълумотига кўра, зилзила 15 август куни маҳаллий вақт билан 04:58 да қайд этилган. Ўчоқ 15 километр чуқурликда жойлашган. Эпицентр Мбай шаҳри яқинида, Шарқий Нуса-Тенгара провинцияси ҳудудида бўлган.

Зилзиладан кейин бир қатор кучли такрорий силкинишлар ҳам кузатилган. Айрим ҳудудларда уй-жойлар, давлат бинолари ва бошқа иншоотларга зарар етган. Флорес оролида вайроналар остида қолганларни қидириш ишлари давом этмоқда.

Зилзиладан сўнг цунами хавфи эълон қилинган. Айрим ҳудудларда баландлиги бир метрдан кам бўлган тўлқинлар қайд этилган, бироқ хавф тахминан уч соатдан кейин бекор қилинган.

Қутқарув хизматлари ҳудудда иш олиб бормоқда. Зилзила оқибатларининг тўлиқ кўлами ҳали аниқланмоқда.