Venesuelada halokatli zilzila bo‘ldi. Qurbonlar 100 mingtaga yetishi mumkin

24-iyun kuni mahalliy vaqt bilan 18:04 atrofida Venesuela poytaxtining g‘arbida kuchli zilzilalar sodir bo‘ldi. Oqibatda Karakasdagi binolar qulab, odamlar vayronalar ostida qoldi. 

Olimlar Janubiy Amerika mamlakati bo‘ylab ko‘plab qurbonlar bo‘lishi va keng ko‘lamli vayronagarchiliklar yuz berishi mumkinligi haqida ogohlantirmoqda.

Talafot ko‘lami

AQSH Geologiya xizmati (USGS) ma’lumotlariga ko‘ra, Karakasdan taxminan 160 km g‘arbda 7,2 magnitudali zilzila sodir bo‘lib, oradan bir daqiqa o‘tmay, 7,5 magnitudali ikkinchi tebranish kuzatilgan.

“Qurbonlar soni ko‘payib, jiddiy talafotlar yuz berishi ehtimoli yuqori. Ofat ko‘lamining qamrovi esa kengayishi mumkin”, — deya xabar berdi Geologiya xizmati. 

Tashkilotning dastlabki taxminlariga ko‘ra, halok bo‘lganlar soni 10 000 dan 100 000 gachani tashkil etishi mumkin.

Muvaqqat prezident Delsi Rodriges favqulodda holat e’lon qilishini hamda tiklash ishlarini qo‘llab-quvvatlash uchun ko‘p tomonlama tashkilotlardan mablag‘ so‘rashini ma’lum qildi.

Mahalliy rasmiylar va guvohlar binolar qulagani, qutqaruv ishlari olib borilayotgani va jarohatlanganlar soni ortayotgani haqida xabar berdi.

Karakasdagi Chakao munitsipaliteti meri Gustavo Dukening xabar berishicha, bir nechta bino qulab tushgan va birgina binoning o‘zidan 18 nafar tirik qolgan kishi qutqarib olingan. U odamlarni jamoat maydonlaridan boshpana izlashga undab, zilzila tebranishlari yana takrorlanishi mumkinligidan ogohlantirdi.

Qutqaruv va cheklovlar

Sohilbo‘yi Falkon shtatida yigirma ikki kishi jarohatlandi, deb xabar berdi gubernator Viktor Klark davlat telekanali orqali. Bedarak yo‘qolgan o‘n besh kishi hamon qidirilmoqda.

Kasalxonalar yangi jarohatlanganlarni qabul qilishga hozirlanyapti.

Karakasdagi “Hospital de Clinicas” shifoxonasi xodimlaridan jarohatlanganlarga yordam berish uchun tungi smenada ikki baravar ko‘proq ishlash so‘ralgan.

Rodrigesning aytishicha, Karakasdan shimolda, qirg‘oqda joylashgan Venesuelaning eng yirik aeroporti — Mayketia yetkazilgan zarar tufayli yopilgan.

Shuningdek, hafta oxirigacha darslar bekor qilindi.

Seysmik xavfli zona

Venesuela Karib va Janubiy Amerika plitalari tutashgan seysmik faol hududda joylashgan.

AQSh Geologiya xizmati ma’lumotlariga ko‘ra, 1812-yilda yuz bergan kuchli zilzila Merida va Karakas shaharlarida katta vayronagarchiliklarga sabab bo‘lgan va o‘shanda qurbonlar soni taxminan 30 000 kishini tashkil etgan.