Х (тwиттер) Австралиянинг ижтимоий тармоқлар ҳақидаги қонунини танқид қилди

Илон Маскнинг X компанияси Австралияни интернет назоратчисига ахборот тўплаш бўйича асоссиз ваколатлар беришга уринишда ҳамда вояга етмаганлар учун ижтимоий тармоқлар тақиқини кучайтириш режалари билан АҚШ қонунларига путур етказишда айблади.

Австралиянинг 16 ёшгача бўлган фойдаланувчилар аккаунтларини чекловчи қонуни ўтган йил декабр ойида кучга кирган, бу эса АҚШдаги ижтимоий медиа компанияларининг танқидига учраган эди.

«Ушбу режалар процессуал адолат, махфийлик, онлайн хизматларга таъсирлар ва Австралиянинг рақамли иқтисодиёти каби жиҳатларни етарлича ҳисобга олмаган», — дейилган X мурожаатида.

Reuters’нинг ёзишича, Маскнинг SpaceX компаниясига қарашли X платформасининг бу даъвоси дунёнинг энг қудратли шахсларидан бири мазкур баҳсга геосиёсий тус бераётганини англатади.

Сешанба куни эълон қилинган мурожаатда X ҳукуматнинг eSafety комиссари ваколатларини кенгайтириш, жумладан, ҳужжатларни талаб қилиш ҳуқуқини ошириш ва максимал жаримани 99 миллион Австралия долларигача (69 миллион АҚШ доллари) кўпайтириш режасини танқид қилди.

Унга кўра, ушбу ўзгартиришлар Австралиядан ташқаридаги ҳар қандай шахсни фақат бирор компания билан «алоқадор» экани сабабли маълумот ва ҳужжатларни тақдим этишга мажбур қилиши мумкин. X бундай ёндашувни халқаро ҳуқуқнинг асосий тамойилларига зид деб баҳолади.

Аввалроқ миллиардер Маск X ижтимоий тармоғидаги постида Австралиянинг ижтимоий тармоқларга қўйган тақиқини «австралияликларнинг интернетдан фойдаланишини назорат қилиш бўйича яширин усул» деб атаган эди.

eSafety томонидан эълон қилинган маълумотлар ҳамда тақиқ жорий этилганидан кейин ўтказилган тадқиқотлар шуни кўрсатдики, 16 ёшгача бўлган австралиялик ўсмирларнинг аксарияти ҳануз ижтимоий тармоқлардаги аккаунтлардан фойдаланмоқда.

eSafety бешта платформага нисбатан ижро даъвосини тайёрлаётганини, бироқ чекланган ваколатлари сабаб бу жараён секин кечаётганини маълум қилди.

Регулятор Сенат қўмитасига билдирган фикрича, ҳужжатларни мажбурий тартибда талаб қилиш бўйича амалдаги чекланган ваколатлар бошқа назорат органлариникига мос келмайди. Шу боис у платформаларнинг қонунга риоя қилаётгани ҳақидаги баёнотларига таянишга мажбур бўлмоқда.