Австралияда ижтимоий тармоқларга қўйилган тақиқ фойда бермаяпти

Ҳукуматнинг 16 ёшгача бўлганлар учун платформаларни тақиқловчи қарори кучга кирганидан уч ой ўтиб ҳам, ҳар 10 нафар австралиялик ўсмирдан 8 нафардан ортиғи ижтимоий тармоқлардан фойдаланишда давом этган. Бунга сабаб –технология компаниялари ёшни самарали текшириш тизимини жорий қила олмаган.

31 июль куни эълон қилинган тадқиқотда eSafety ташкилоти аниқлашича, 10 – 15 ёшли болаларнинг аксарияти март ойида ҳам ижтимоий тармоқлардан 2025 йил 10 декабрда тақиқ кучга киришидан аввал қандай бўлса, шундай фойдаланган. Шунингдек, ота-оналарнинг фарзандларининг бу хатти-ҳаракатидан бохабарлиги камайган.

Австралия ижтимоий тармоқларнинг ўсмирлар саломатлигига таъсири борасидаги хавотирлар туфайли дунёда биринчи бўлиб тақиқ жорий қилди. Ўшандан бери худди шу чекловни жорий этишни кўриб чиқаётган давлатлар ҳам мамлакатдаги тақиқнинг амалга оширилиш жараёнини диққат билан кузатмоқда.

Ўсмирлар орасида сўров

Тақиқдан олдин сўровда қатнашган болаларнинг қарийб 86 фоизи камида битта ёш чекланган платформадан фойдаланишини айтган. Аммо уч ой ўтиб ҳам бу кўрсаткич 81 фоиздан юқорилигича қолган.

Ўсмирларнинг қарийб 58 фоизи ижтимоий тармоқлардан ҳар куни ёки тез-тез фойдаланишини айтган, бу тақиқдан аввалги тахминан 60 фоизлик кўрсаткичдан деярли фарқ қилмайди.

Ўз аккаунтларини сақлаб қолган болаларнинг деярли ярми платформалар уларнинг ёшини текширмаганини маълум қилган. Бу эса уларнинг хизматлардан фойдаланишда давом этишига сабаб бўлган.

Бошқалар эса аккаунтларида ёш 16 ёки ундан катта деб кўрсатилганини ёки ёшни текшириш тизимлари уларни белгиланган ёш чегарасидан катта деб хато аниқлаганини маълум қилган.

Март ойидаги янгиланишдан сўнг eSafety бешта платформа (Фаcебоок, Instagram, Snapchat, Tik, YouTube) томонидан қоидаларга риоя қилмаслик ҳолатларини текшираётганини билдирди.

Июнь ойида ҳукумат тақиққа амал қилмаган технологик ширкатларга нисбатан қўлланиладиган энг юқори жарима миқдорини икки бараварга оширишини ва эСафетйънинг маълумот йиғиш ваколатларини кучайтиришини эълон қилди.